O alcalde de Sarria, Claudio Garrido, recibiu no mediodía de onte a Quique, un mozo de 14 anos que padece sarcoma alveolar, xunto a un grupo de familiares e amigos que comeza hoxe, martes 6 de agosto, unha peregrinación a Santiago de Compostela. O obxectivo desta iniciativa, que reúne a preto de 50 persoas, é percorrer a pé os 115 quilómetros que separan Sarria de Santiago para recadar 100.000 euros destinados á investigación do cancro infantil.
A campaña, denominada ‘El Sello de Quique‘, está organizada pola Fundación CRIS contra el cáncer en colaboración coa Fundación Iñaki Nogueroles Jóvenes contra el cáncer. O propósito é aumentar a visibilidade e obter fondos para o ensaio clínico CAR4SAR, que se está a desenvolver na Unidade CRIS de Terapias Avanzadas en cancro infantil do Hospital Universitario La Paz, en Madrid.
Ao longo da ruta, Quique e o seu equipo camiñarán para sensibilizar á sociedade sobre a necesidade de investigar e desenvolver novas terapias para o sarcoma alveolar, un tipo de cancro raro e resistente aos tratamentos convencionais. As persoas que desexen apoiar esta causa poden facer as súas doazóns a través da seguinte ligazón: elsellodequique.ganaralcancer.com/campaigns/Familia-de-Quique.
O percorrido culminará o 11 de agosto na Praza do Obradoiro, onde Quique será recibido polo Conselleiro de Sanidade, Antonio Gómez Caamaño, e realizará unha ofrenda ao Apóstolo Santiago durante a Misa do Peregrino.
A Fundación CRIS contra el cáncer é unha organización independente sen ánimo de lucro dedicada á investigación do cancro, con sedes en España, Reino Unido e Francia. Financia proxectos en 80 centros de investigación e hospitais en 16 países, e ten investido 50 millóns de euros en investigación nos últimos 14 anos.
Pola súa banda, a Fundación Iñaki Nogueroles Jóvenes contra el cáncer, fundada en 2010 tras o falecemento de Iñaki Nogueroles, céntrase en apoiar aos mozos con cancro e mellorar a súa calidade de vida mediante proxectos innovadores e de sensibilización.
