O partido UCIN denunciou este sábado a falta de medidas específicas de accesibilidade por parte do Concello de Santiago para garantir que as persoas con mobilidade reducida poidan asistir ás procesións da Semana Santa en condicións adecuadas, especialmente no ámbito do casco histórico.
A formación cualifica esta situación como unha problemática “grave e recorrente”, que —segundo indica— se ve agravada durante eventos multitudinarios como as celebracións relixiosas destes días. O futuro candidato á alcaldía, Diego Adrián Mallo Cao, sinala que a súa actual situación de mobilidade reducida lle permitiu “comprobar de primeira man” as dificultades existentes na cidade.
“Estamos falando de dereitos básicos. Non pode ser que haxa veciños e visitantes que non poidan ver as procesións por falta de previsión e sensibilidade do Concello”, afirmou.
Dende UCIN consideran que non existen zonas habilitadas, accesibles e reservadas para persoas con dificultades de mobilidade, maiores ou con necesidades especiais, nun dos eventos que cualifican como de maior relevancia relixiosa, cultural e turística da cidade.
A formación tamén apunta á presenza de barreiras arquitectónicas na zona histórica, unha situación que —segundo aseguran— se intensifica durante a Semana Santa debido á elevada afluencia de público e á ausencia dunha planificación específica para estes eventos.
Ademais, critican a falta de “compromiso real” por parte do goberno local en materia de accesibilidade, ao considerar que as declaracións institucionais non se traducen en actuacións concretas.
PROPOSTAS PARA MELLORAR A ACCESIBILIDADE
Entre as medidas propostas por UCIN destacan a creación de espazos reservados e sinalizados ao longo dos percorridos procesionais, a mellora dos accesos e a habilitación de itinerarios seguros na zona histórica. Tamén reclaman a posta en marcha dun dispositivo específico de apoio e información, así como unha planificación anticipada que permita garantir a inclusión en eventos públicos ao longo de todo o ano.
Dende a formación esixen ao Concello unha actuación inmediata e a incorporación da accesibilidade como criterio prioritario na organización de actividades. “Santiago non pode seguir sendo unha cidade que presume de universalidade mentres exclúe, na práctica, a parte da súa propia veciñanza”, concluíu o candidato.
