O dúo vigués Fillas de Cassandra presentará en Santiago de Compostela a exposición ‘TERTÚLIA: doce cancións, doce cadeiras’, unha proposta que permitirá ao público acceder de maneira anticipada ao seu novo traballo discográfico a través dunha experiencia inmersiva.
A mostra desenvolverase na Fundación Granell durante dúas xornadas consecutivas. O martes poderá visitarse entre as 16:00 e as 20:00, mentres que o mércores abrirá en horario de mañá, de 11:00 a 14:00, e tamén pola tarde, de 16:00 a 20:00. A entrada será libre e gratuíta.
A exposición está composta por doce pezas escultóricas que funcionan como soporte para a escoita das cancións que integran o novo proxecto do grupo, titulado ‘Tertúlia’. Segundo trasladou o equipo artístico, a iniciativa busca ofrecer unha “experiencia única de preescoita”, convertendo o acto de escoitar música nun percorrido físico e sensorial.
Para participar na actividade, recoméndase ás persoas asistentes acudir con auriculares propios, xa que estes serán necesarios para acceder ao contido sonoro das pezas.
A proposta continuará esa mesma semana en Madrid, no espazo Infinito Delicias, onde poderá visitarse o sábado en horario de 9:00 a 19:00. Neste caso, está prevista tamén unha presentación coas artistas ás 13:00, para a que será preciso realizar reserva previa.
O lanzamento oficial do álbum terá lugar o 24 de abril nas plataformas dixitais. Posteriormente, o proxecto será presentado en directo o 9 de maio no Recinto Feiral de Pontevedra, nun evento que marcará a estrea escénica deste novo traballo.
