A concelleira de Dereitos e Servizos Sociais, Promoción Económica e Xuventude, María Rozas, presentou este martes as actividades do mes de abril da campaña ’12 Comercios, 12 Sensibilidades’, unha iniciativa municipal que busca vincular o comercio local co labor de entidades sociais da cidade. Nesta ocasión, o proxecto desenvolverase na Libraría Couceiro, en colaboración coa asociación Dano Cerebral Santiago de Compostela, coincidindo co mes do libro.
Rozas destacou o papel do comercio de proximidade como elemento dinamizador da cidade e subliñou a traxectoria da libraría, con case seis décadas de actividade en Santiago. “É un exemplo do que se entende por comercio local que axuda a facer cidade”, afirmou, ao tempo que agradeceu a súa incorporación a esta terceira edición da campaña.
A edil explicou que o obxectivo desta iniciativa é “visibilizar aínda máis o traballo das entidades sociais” a través de espazos comerciais, facilitando que a cidadanía coñeza a súa actividade no contexto do consumo local. Neste sentido, sinalou que durante abril se habilitará un punto informativo na libraría, acompañado dunha exposición fotográfica e diversas actividades abertas ao público.
Pola súa banda, María Couceiro, representante do establecemento, indicou que a participación na campaña foi unha decisión inmediata. “Non houbo ningunha dúbida en dicir que si”, afirmou, e incidiu na dificultade de escoller unha entidade concreta entre as moitas que desenvolven o seu labor na cidade. Finalmente, optaron por Dano Cerebral Santiago de Compostela, unha organización coñecida a través do “boca a boca”, segundo explicou.
Couceiro puxo o foco na dimensión social da proposta, destacando a importancia de facilitar o acceso a actividades culturais e cotiás a persoas usuarias destas entidades. “Non hai persoas de primeira e de segunda”, afirmou, en relación coa necesidade de promover espazos inclusivos.
Entre as actividades programadas, salientou a presentación do libro Come a lavadora dunha vez!, de Rosa Neiros e Adrián Jamardo, unha obra dirixida ao público infantil que aborda o dano cerebral. A presentación terá lugar o 22 de abril, na véspera do Día do Libro.
A directora de Dano Cerebral Santiago de Compostela, Rocío García Calvo, valorou esta colaboración como unha oportunidade para reforzar a sensibilización social arredor desta realidade. “A xente compostelá ten que seguir coñecendo o que implica o dano cerebral adquirido”, indicou.
García Calvo explicou que a programación inclúe tamén dous talleres de encadernación, previstos para os días 10 e 17 de abril, nos que participarán persoas usuarias da entidade xunto con alumnado do colexio López Ferreiro. Estas actividades teñen un carácter interxeracional e buscan fomentar o intercambio de experiencias.
A responsable da entidade incidiu na importancia de dous eixos fundamentais: a prevención e a rehabilitación. “Previr é posible e recuperarse tamén o é na maioría dos casos”, afirmou, destacando o traballo que se realiza desde a asociación no acompañamento ás persoas afectadas e ás súas familias.
A campaña complétase cunha exposición fotográfica e co punto informativo permanente na libraría, desde o que se ofrecerá atención á cidadanía interesada en coñecer máis sobre o dano cerebral.
Rozas concluíu a presentación animando á veciñanza a achegarse á Libraría Couceiro durante o mes de abril: “Visitar a libraría sempre é un bo plan, pero neste mes aínda máis”, sinalou, facendo fincapé na importancia de apoiar tanto o comercio local como o labor das entidades sociais da cidade.
