Varias decenas de persoas concentráronse hoxe na praza do Obradoiro para demandar a readmisión dos voluntarios e voluntarias do refuxio de Bando, apartados das súas tarefas despois de protestaren polo sacrificio do can Gosu. A mobilización, convocada tras semanas de tensión no servizo, partira da Alameda e concluíu diante da casa do Concello coa lectura dun manifesto.
Segundo explicou unha das portavoces, Marta Ballesteros, “non nos deixan acceder ao recinto dende o día 27”, en referencia á xornada posterior á protesta polo animal. Asegura que o grupo afectado rolda a quincena de persoas, dentro dun colectivo duns trinta colaboradores que, segundo destacou, son “xente responsable, que leva anos facendo tarefas básicas para o benestar dos animais”.
Entre esas tarefas inclúense pasear cans, limpar gateras, preparar lavandería ou apoiar na hixiene dos animais, funcións que os participantes consideran imprescindibles para o funcionamento diario do refuxio. Ballesteros atribuíu a situación a “unha medida de presión para que esteamos caladiñas” e reclamou que se permita retomar a actividade voluntaria e que se garanta “unha xestión responsable do centro”.
