O concelleiro de Mobilidade de Santiago, Xan Duro, recoñeceu, en reacción ás reclamacións de Erguer, que o funcionamento da liña 15 do autobús urbano, que conecta o Campus Norte co resto da cidade, é “mellorable”, pero lembrou que a situación actual do servizo “está condicionada pola orde de continuidade da concesión”. Segundo explicou a Xornal de Compostela, o Goberno local prevé iniciar “en breve” o proceso de nova licitación do transporte urbano, que permitirá introducir melloras “de maneira notable”.
Duro indicou que, nas actuais condicións, non é posible realizar grandes cambios na prestación do servizo con respecto ao establecido na concesión vixente. Con todo, apuntou que o Concello xa aplicou axustes nos primeiros horarios de saída para facilitar o acceso do estudantado ás facultades antes das 09:00.
En concreto, engadiuse un novo servizo ás 07:55 dende o Campus Norte, que se suma ao das 08:20, permitindo que ambos cheguen ao Campus Sur antes das 09:00. Pola súa banda, dende o Campus Sur cara ao Norte hai agora saídas ás 08:15 e 08:25, co mesmo obxectivo.
O edil recoñeceu que o servizo experimenta dificultades en días de choiva ou con alta demanda, pero insistiu en que, mentres non se adxudique o novo contrato, non hai marxe para reforzar as frecuencias “na medida que sería desexable”.
As declaracións prodúcense despois de que o colectivo estudantil ‘Erguer. Estudantes da Galiza’ impulsase unha campaña de recollida de sinaturas para reclamar melloras nesta liña, que cualifican de “impuntual e insuficiente” para atender a demanda do alumnado universitario.
