O colectivo Erguer iniciou esta mañá unha campaña de recollida de sinaturas para reclamar ao Concello de Santiago unha mellora na frecuencia e puntualidade da liña 15 de autobús urbano, que conecta o Campus Norte co resto da cidade. Pola mañá, membros da organización instalaron unha mesa informativa na entrada da Facultade de Ciencias da Comunicación, mentres que pola tarde teñen previsto continuar a iniciativa na Residencia Universitaria Burgo das Nacións.
Segundo explicou o colectivo nun manifesto, o funcionamento da liña é “irregular, impuntual e incapaz de atender a demanda”, o que consideran “impropio dunha das liñas esenciais de Compostela”. Erguer denuncia que centos de estudantes sofren atrasos, saturación e cancelacións de buses, o que “dificulta o normal desenvolvemento da súa actividade académica”.
A organización asegura ter recollido máis de 600 sinaturas nunha mañá, o que interpretan como mostra “da preocupación e implicación do estudantado compostelán”. Ante a falta de avances tras manter contactos coa Concellería de Transportes, dirixida por Xan Duro, e coa empresa concesionaria Tussa, Erguer decidiu “pasar á acción” e continuar coa recollida de apoios ata obter compromisos concretos.
Entre as súas demandas, o colectivo solicita duplicar as frecuencias entre as 08:00 e as 09:00 horas en dirección ao Campus Norte, garantir a puntualidade do servizo e incorporar unha saída os domingos pola tarde, cunha frecuencia mínima dunha hora, que facilite o desprazamento do alumnado residente no Burgo das Nacións e no propio campus.
“Non imos quedar de brazos cruzados mentres Compostela Aberta ignora unha problemática que afecta cada día á vida de centos de estudantes”, sosteñen dende Erguer, que avanza que continuará impulsando accións ata que “a voz do estudantado sexa escoitada e as súas demandas se convertan en feitos reais”.
