A reapertura da Sala Malatesta, na rúa de San Lourenzo, volveu espertar o malestar veciñal no barrio compostelán. A Asociación de Veciños Río Sarela-San Lourenzo denunciou esta semana que, tras os primeiros días de actividade do local, regresaron “os problemas de sempre”: ruído, lixo e altercados nas rúas próximas ao establecemento. Nunha publicación nas súas redes, a entidade cualificou a situación de “intolerable” e acusou ao Concello de Santiago de “facernos a vida imposible”.
A Coordinadora das Asociacións Veciñais de Santiago de Compostela emitiu un comunicado no que manifesta o seu apoio incondicional á veciñanza de San Lourenzo e lembra que a actividade da sala, “ao desenvolverse en horario nocturno”, foi cualificada “de xeito reiterado pola xurisprudencia como molesta e prexudicial para a saúde”. O colectivo considera que a reapertura “é incompatible co uso residencial da contorna” e insta ao goberno local a garantir “os dereitos constitucionais dos veciños á saúde e á inviolabilidade do domicilio”.
No mesmo sentido, as asociacións veciñais que integran a Coordinadora acordaran xa en setembro “apoiar sen fisuras” á Asociación Río Sarela ante a posibilidade de que o local volvese abrir. No documento, subliñaban que o ocio nocturno é unha actividade molesta e insalubre, e pedían ao Concello que esta incompatibilidade se recoñeza expresamente no PXOM e no Plan Especial PE-1, que protexe o uso residencial do barrio.
Pola súa parte, a alcaldesa de Santiago, Goretti Sanmartín, respondeu ás críticas lembrando que o Concello “seguirá examinando que se cumpran todos os requisitos para garantir que non haxa ruído exterior”. A rexedora explicou que a normativa actual só obriga a presentar unha comunicación previa para a reapertura, mais asegurou que o goberno local manterá a súa “sensibilidade coas reclamacións veciñais” e coa defensa do dereito ao descanso.
A Malatesta fora obrigada a pechar por orde municipal en dúas ocasións por incumprimentos relacionados coa contaminación acústica, aínda que a xerencia asegurou que se trataba dunha medida ilegal, como informou no seu momento Xornal de Compostela. A súa recente reapertura, con entrada libre durante a fin de semana, reavivou un conflito veciñal que leva máis dunha década aberto e que volve situar o equilibrio entre ocio e convivencia no centro do debate sobre o modelo de cidade.
