O Concello de Santiago celebrou este venres o acto central con motivo do Día Internacional do Orgullo LGBTIQ+, cunha lectura pública da declaración institucional aprobada por unanimidade no Pleno do pasado 26 de xuño. A sesión, que tivo lugar na praza do Obradoiro, contou coa participación de representantes das cinco forzas políticas con presenza na corporación, así como da alcaldesa Goretti Sanmartín, que abriu o acto cunha intervención onde reiterou o “compromiso institucional coas persoas e co colectivo LGBTI na defensa do seu dereito a vivirmos en diversidade”.
A declaración foi lida de maneira coral polas concelleiras e concelleiros Mercedes Rosón (non adscrita), Xan Duro (Compostela Aberta), Marta Abal (PSOE), Pilar Lueiro (BNG) e Borja Rubio (PP), pechando a lectura a propia rexedora. O texto lembra a revolta de Stonewall, acontecida en Nova York en 1969, como fito fundacional do movemento LGBTIQ+ moderno e salienta a importancia da memoria colectiva e da mobilización social para a defensa dos dereitos.
Ao longo da lectura, as distintas voces políticas coincidiron na necesidade de facer fronte ao avance da ultradereita e dos discursos de odio, que buscan “facer retroceder as conquistas en materia de dereitos humanos”. A concelleira socialista Marta Abal advertiu sobre “unha nube negra” que ameaza as liberdades conquistadas, mentres Pilar Lueiro (BNG) alertou contra “a deriva ultraconservadora e involutiva” que cuestiona os avances do feminismo e do movemento LGBTIQ+. Pola súa parte, Borja Rubio (PP) reivindicou o “compromiso transformador” do Concello de Santiago e definiu a cidade como “referente na defensa dos dereitos das persoas LGBTIQ+”.
A alcaldesa Goretti Sanmartín destacou finalmente o papel do Servizo de Asesoramento LGBTIQ+, en funcionamento na Casa das Mulleres Xohana Torres, como resposta a unha demanda histórica do movemento asociativo local. A rexedora insistiu en que o Concello está a impulsar políticas ambiciosas e transversais en materia de igualdade, incluíndo áreas como a educación, a saúde, a cultura, a mocidade ou o urbanismo.
O acordo recollido na declaración institucional compromete ao goberno local a apoiar os actos convocados polo movemento LGBTIQ+ o 28 de xuño, garantir unha perspectiva interseccional nas políticas municipais, consolidar o servizo de asesoramento, recuperar a memoria histórica LGBTIQ+ compostelá e desenvolver campañas de sensibilización contra a LGBTIQfobia, tanto na cidade como nas redes sociais. Sanmartín pechou o acto reafirmando que “a liberdade, a diversidade e a dignidade deféndense cada día, nas rúas e nas institucións”.
