O persoal dos concesionarios Volkswagen do Grupo Yáñez en Santiago de Compostela, A Coruña e Ferrol iniciou este martes unha xornada de folga para reclamar información sobre o futuro da empresa, o cobro das nóminas pendentes e a continuidade dos postos de traballo. A mobilización, convocada pola CIG-Industria, incluíu unha concentración ás 12:00 horas diante das instalacións compostelás do concesionario, situado na cidade.
A decisión de mobilizarse chega tras meses de incerteza laboral, agravada pola entrada da empresa en preconcurso de acredores o pasado 18 de decembro. Segundo a central sindical, desde entón a situación empeorou notablemente: falta de liquidez, impagos salariais, talleres sen actividade e a práctica desaparición do xerente da empresa.
A CIG denuncia que o administrador concursal designado só comezou a ofrecer información a principios de abril, na que destacou a intención de aplicar un ERE que podería afectar ata ao 50% do persoal, actualmente formado por máis dun centenar de traballadores. Ademais, indican que a actividade nos centros da Coruña e Ferrol está case paralizada pola falta de pezas e subministracións, mentres que en Santiago o concesionario mantén un funcionamento parcial.
Vicente Vidal, representante da CIG en Ferrol, explicou que os impagos acumulados e a ausencia de comunicación institucional están a causar graves problemas económicos para as traballadoras e traballadores. “Moitas persoas levan meses sufrindo retrasos continuos nas nóminas e nas pagas extraordinarias”, sinalou. Segundo o sindicato, esta situación vén de atrás e é resultado dunha “nefasta xestión empresarial” que provocou o colapso dos subministradores e a perda de confianza no grupo.
O pasado mércores, o persoal recibiu a metade do salario de marzo sen aviso previo, sen que exista aínda garantía do cobro do resto da nómina nin dos seguintes pagamentos. A incerteza sobre o futuro da empresa e a posible venda dos concesionarios sen manter o actual cadro de persoal elevou a preocupación entre os traballadores, que reclaman un plan de viabilidade claro e público.
Desde a CIG non descartan novas mobilizacións nas vindeiras semanas se non hai unha resposta concreta por parte da empresa ou do administrador concursal. “A dirección debe explicar se o seu obxectivo é manter a actividade ou simplemente vender os activos, deixando á marxe á plantilla”, advirten desde o sindicato.
A folga en Santiago enmárcase nun calendario de protestas que terá continuidade nos vindeiros días, coa intención de visibilizar a situación do Grupo Yáñez e esixir solucións urxentes que garantan o futuro da actividade e os postos de traballo nas tres cidades galegas.
