Os traballadores do transporte urbano de Santiago agrupados na Unión Temporal de Empresas (UTE) Tralusa e Monbus alcanzaron un acordo que levou á desconvocatoria total da folga, polo que se cancela o paro previsto para este venres e tamén a posibilidade de converterse en indefinida.
Os condutores de Tralusa e Aulusa, as dúas corporacións agrupadas na UTE, solicitaban a creación dun cadro de persoal único para evitar un desequilibrio entre as condicións laborais duns e outros. Ata o momento, os traballadores de Aulusa encargábanse de exercer de “correturnos”, é dicir, cubrindo as libranzas por vacacións ou baixas do persoal de Tralusa.
O preacordo alcanzado este xoves coa empresa –e apoiado de forma case unánime polo persoal en asemblea posterior– supón que se elaborará un novo cadro de servizos, no que se asignará o sitio no cadro de persoal en función da antigüidade, segundo traslada a CIG en nota de prensa.
Ademais, para o persoal que permaneza como “correturnos” establécese un prazo máximo de dous anos nesta situación e un sistema rotatorio equitativo para as coberturas temporais de ocos no cadro.
Para o responsable de transporte en Santiago da CIG, Inácio Pavón, “isto supón o final dunha discriminación que viña producindo desde o inicio desta contratación pola cal había traballadores e traballadoras con diferentes dereitos realizando o mesmo traballo”.
O representante do sindicato cualificou como un “éxito” do persoal para “demostrarlle á empresa que non se toleran xa as faltas de respecto”. Ademais, o persoal agradece a través do comunicado emitido pola organización as mostras de apoio dos usuarios do transporte público, que os “animaron a defender os seus dereitos e as súas xustas reivindicacións”.
