A plataforma Compostela por Palestina (CxP) denunciou o roubo dunha faixa solidaria coa mensaxe ‘PALESTINA LIBRE’ que estaba pendurada na entrada da Alameda desde o mes de xullo de 2024. O roubo, segundo indica o colectivo, produciuse entre as 18:00 horas do 26 de febreiro e as 9:00 horas do 27 de febreiro, e a plataforma atribúe o acto a persoas ou grupos pro-sionistas, considerando o feito como “unha nova forma de ataque ao pobo palestino”.
Esta acción prodúcese pouco despois de que o Pleno Municipal de Santiago aprobase unha moción de apoio ao pobo palestino, con votos favorables do BNG, PSdeG e CA, na que se denunciaba o xenocidio perpetrado por Israel e se defendían os dereitos fundamentais do pobo palestino. Entre outras medidas, o texto insta ao Goberno do Estado español a apoiar a denuncia de Sudáfrica contra Israel no Tribunal Internacional de Xenocidio (CIX).
DENUNCIAS E NOVAS ACCIÓNS
A plataforma presentou unha denuncia por roubo na Comisaría da Policía Nacional o pasado luns, solicitando que se revisen as cámaras de vixilancia municipais e doutros establecementos próximos á Alameda, co obxectivo de identificar os autores do roubo, un proceso que podería levar á presentación de cargos no Xulgado de Garda.
A faixa, de grande valor artístico e solidario, fora realizada polo artista galego Yoseba Muruzábal. Ante o roubo, a plataforma non se amedrentou e pendurou de inmediato unha nova faixa idéntica, reafirmando o seu compromiso coa causa palestina. “Como alegoría da resistencia do pobo palestino, nós tamén resistimos”, indicaron dende a plataforma.
O roubo coincide coas protestas previstas pola chegada da Volta Ciclista ‘Gran Camiño’, na que participa un equipo israelí, o que engade máis tensión ao contexto local.
