A alcaldesa de Santiago, Goretti Sanmartín, avanzou que o goberno municipal convocará o vindeiro martes 17 de marzo a Comisión de Facenda para someter á súa consideración o proxecto de Orzamentos municipais de 2026, que superan os 148 millóns de euros. Sanmartín fixo este anuncio ante os medios de comunicación durante unha visita ao barrio de Fontiñas, onde foi preguntada polo estado das contas municipais para o próximo exercicio. Tras este primeiro paso, o seguinte trámite será a convocatoria dun pleno municipal no que os orzamentos deberán ser sometidos a votación.
A rexedora explicou tamén que nas últimas semanas mantivo conversas tanto co Partido Socialista como coas concelleiras non adscritas, co obxectivo de incorporar algunhas das súas propostas ao proxecto. “Introducíronse algunhas das súas propostas no documento, polo que entendemos que é lóxico que exista un apoio a estes orzamentos”, sinalou a alcaldesa. O goberno local confía así en sumar os apoios necesarios para sacar adiante as contas municipais, que marcarán as prioridades de investimento e gasto da cidade para o ano 2026.
