Onte, mércores 22 de xaneiro, o Salón Rahid do Hotel Araguaney en Santiago de Compostela acolleu a conferencia ‘Solidaridade cos xornalistas de Palestina’, organizada pola Asociación de Periodistas de Santiago de Compostela (APSC) en colaboración coa Federación Internacional de Periodistas (FIP). O evento, presidido por Xulia Campo, contou coa intervención de Nasser Abu Baker, presidente do Sindicato de Xornalistas de Palestina (PSJ) e vicepresidente da FIP, quen expuxo a grave situación que atravesa o xornalismo no seu país.
Un acto de denuncia e recoñecemento
Xulia Campo, presidenta da asociación, abriu o acto destacando o dobre obxectivo da xornada: celebrar o patrono dos xornalistas e honrar o traballo dos profesionais palestinos, vítimas dunha persecución sistemática. “Os xornalistas en Palestina convertéronse en obxectivos preferentes. Máis de 200 foron asasinados, moitos deles por francotiradores, nun intento de exterminar a verdade”, afirmou Campo.
Luis Menéndez, representante da FIP, quen tamén participou no acto, agradeceu a oportunidade de participar no acto e presentou a Nasser Abu Baker, definíndoo como, ademais dun gran compañeiro, un exemplo de integridade profesional.
O relato de Nasser Abu Baker: unha testemuña directa
A intervención principal correu a cargo de Nasser Abu Baker, quen, a través da interpretación dende o árabe de Ghaleb Jaber Ibrahim, propietario do Hotel Araguaney, describiu a situación en Palestina e o impacto da guerra no exercicio do xornalismo. “En Palestina fomos privados da liberdade de movemento, palabra e agora tamén da vida. Gaza é o campo de concentración máis grande do mundo”, denunciou.
O presidente do PSJ compartiu cifras estremecedoras: desde o inicio do último conflito o 8 de outubro de 2023, máis de 200 xornalistas foron asasinados, o que supón unha morte cada dous días. Outros 400 profesionais resultaron feridos, moitos deles con amputacións que lles impediron continuar coa súa labor. “Israel converteu o xornalismo nun obxectivo. As radios locais foron destruídas e os centros de comunicación clausurados”, explicou.
As dificultades de informar en Gaza
Abu Baker describiu as condicións extremas nas que os xornalistas palestinos traballan. Sen acceso a recursos básicos como electricidade, internet ou transporte, moitos durmen e traballan entre os cadáveres. “O xornalista palestino nunca deixa de ser palestino. Moitos dos meus compañeiros morreron nas súas casas ou nas súas oficinas, intentando informar”, lamentou.
O relato de Abu Baker foi especialmente emotivo ao lembrar os seus compañeiros falecidos, a maioría deles coñecidos persoalmente. “Non son números, son os meus irmáns, amigos e compañeiros”, engadiu.
Un chamamento á acción internacional
O acto concluíu cunha chamada á comunidade internacional e aos profesionais da comunicación para que manteñan a súa solidariedade co pobo palestino e coa liberdade de prensa. “Israel considera a información un inimigo, porque o máis fácil para ocultar a verdade é eliminar os testemuños”, sentenciou Nasser.
