A Plataforma Galega en Defensa do Ensino Público convocou unha gran manifestación para o próximo 26 de outubro co obxectivo de mobilizar a toda a comunidade educativa contra os recortes no sistema educativo galego. A convocatoria chega tras un comezo de curso marcado pola falta de profesorado, sobre todo en áreas críticas como a atención á diversidade, e pola ausencia de resposta ás demandas de alumnado e profesorado de secundaria, FP e ensinanzas especiais.
Nunha rolda de prensa celebrada esta mañá, as organizacións que conforman a plataforma, entre as que se atopan CIG-Ensino, ANPAS Galegas e ERGUER, denunciaron que a situación actual afecta a case a metade dos centros educativos públicos de Galicia. Segundo Suso Bermello, secretario nacional de CIG-Ensino, “a realidade nos centros desmonta a propaganda da Consellaría, que se nega a recoñecer a gravidade da situación”.
A manifestación, para a que se facilitará transporte desde distintos puntos de Galicia, quere ser un chamamento á unidade de todas as familias, estudantes e profesorado na defensa do ensino público galego.