A Concellería de Sustentabilidade Ambiental reforzou nas últimas semanas os labores de mantemento da rede municipal de drenaxe, cun operativo que abrangueu a limpeza de sumidoiros, reixas, colectores e outros elementos destinados á captación e evacuación da auga de choiva. A actuación centrouse, sobre todo, na retirada de follas e restos vexetais en zonas onde se producen acumulacións recorrentes.
Segundo trasladou o departamento que dirixe Xesús Domínguez, os traballos desenvolvéronse en quenda de mañá e tarde, combinando a actividade das brigadas municipais, as varredoras e o persoal das empresas concesionarias Viaqua e Urbaser. O obxectivo é asegurar que a rede manteña a súa capacidade plena de captación, reducindo así o risco de encharcamentos en superficie durante os episodios de precipitación máis intensa.
Ao longo das últimas dúas semanas realizáronse intervencións en preto de 40 puntos distribuídos por todo o termo municipal, incluíndo áreas residenciais, vías principais e outras zonas consideradas sensibles pola acumulación de follas do outono. Desde a concellería salientan que estas tarefas se activaron de maneira preventiva coincidindo co incremento da probabilidade de choivas durante o mes de outubro.
Domínguez subliñou que “a planificación anticipada e a retirada continua de material vexetal” contribúe a evitar problemas asociados á saturación da rede, ao tempo que mellora a capacidade de resposta ante precipitacións intensas. O Concello mantén operativo este plan reforzado co fin de minimizar incidencias e garantir o correcto funcionamento da drenaxe urbana durante as vindeiras semanas.
