O vindeiro martes 17 de febreiro celebrarase no Centro de Estudos Avanzados de Santiago a xornada ‘Cambio climático e Mobilidades humanas’, unha iniciativa centrada na análise da migración forzada por factores ambientais. A actividade enmárcase no proxecto de investigación Eco-RefugLit, desde o que se advirte de que fenómenos como a degradación ambiental ou os episodios meteorolóxicos extremos non están contemplados no marco xurídico actual do dereito de asilo, a pesar do aumento previsto de eco-refuxiados nas próximas décadas.
Durante a sesión matinal, que se desenvolverá entre as 10.00 e as 14.00 horas, o profesor da Universidade de Santiago de Compostela e experto en historia ambiental Marco Armiero ofrecerá unha conferencia. Previamente, Jorge Sacido e Noemí Pereira presentarán aos asistentes o proxecto Eco-RefugLit. A xornada concluirá cun coloquio titulado ‘Migracións forzadas polo cambio climático’, no que se abordarán as implicacións sociais, ambientais e xurídicas deste fenómeno. Xa pola tarde, na Facultade de Filoloxía da USC, está prevista a proxección do documental ‘Bolboretas negras’, seguida dun coloquio no que participará o seu director, o cineasta tinerfeño David Baute.
Segundo indicaron desde a organización, a migración forzada por motivos bélicos, relixiosos ou ambientais medrou “exponencialmente” no que vai de século, sendo o caso dos eco-refuxiados especialmente preocupante pola ausencia dun marco legal específico que os recoñeza. A asistencia á xornada é aberta ao público ata completar aforo. As inscricións estarán dispoñibles ata o luns anterior ás 14.00 horas a través dun formulario en liña.
