O Ateneo de Santiago acollerá o luns 20 ás 19:30 en Afundación (Rúa do Vilar, 19) unha conferencia titulada ‘Máis alá do petróleo: o futuro dos combustibles renovables’, a cargo de Jacobo Porteiro, investigador do Grupo de Tecnoloxías Enerxéticas (GTE) do Centro de Investigación en Tecnoloxías, Enerxía e Procesos Industriais (CINTECX) da Universidade de Vigo.
Na súa intervención, Porteiro afondará nos desafíos da transición enerxética e nos compromisos internacionais de neutralidade en carbono, analizando o potencial dos biocombustibles, o hidróxeno verde, o biogás e outras fontes alternativas como ferramentas para avanzar cara a unha economía descarbonizada. O investigador explicará tamén como estas tecnoloxías poden xerar novas oportunidades para Galicia, en especial nos sectores forestal, agroalimentario, naval e do transporte, pola súa capacidade de producir recursos limpos e reducir emisións.
Jacobo Porteiro Fresco (Vigo, 1976), catedrático de Máquinas e Motores Térmicos na Universidade de Vigo, é unha das voces de referencia en enxeñaría térmica, eficiencia enerxética e combustión. Autor de máis de 130 publicacións científicas e con 6.000 citas internacionais, representa a España no Comité de Combustión da Axencia Internacional da Enerxía (IEA). Ao longo da súa carreira desenvolveu tamén tarefas de responsabilidade universitaria vinculadas á sustentabilidade e á transición enerxética, centrando a súa investigación en modelos tecnolóxicos que permitan avanzar cara a un futuro pospetróleo.
