O secretario xeral de Universidades, José Alberto Díez, e a directora da Axencia Galega de Innovación, Carmen Cotelo, visitaron este martes o Centro Singular de Investigación en Tecnoloxías Intelixentes (Citius), da USC.
Trátase, puxeron en valor, dun dos centros referentes de Galicia na investigación da intelixencia artificial, especialmente no campo das tecnoloxías lingüísticas, o ámbito de maior impacto actual neste campo.
Guiados polo director científico do centro, Senén Varro, os representantes da consellería profundaron nas investigacións que viran ao redor dos dispositivos e a computación verde e intelixente, así como nos fundamentos da intelixencia artificial.
Ademais, o centro traballa as tecnoloxías intelixentes tendo en conta o marco ético, social, económico e cultural que os engloba para “facer da intelixencia artificial unha ferramenta confiable”, destaca o Goberno galego.
A Xunta está a investir case 6 millóns neste centro, un dos 13 que compoñen a rede de Centros de Investigación de Excelencia do Sistema Universitario de Galicia. Grazas a este apoio, os máis de 100 investigadores que traballan no Citius están a desenvolver iniciativas como o Proxecto Nós, para incorporar o galego ás novas linguaxes dixitais.
Entre outras actuacións destacadas, tamén traballan en proxectos ao redor da monitorización predictiva e causalidade para rehabilitación cardíaca ou de observación e predición da calidade do aire a escala urbana.
