A alcaldesa de Santiago, Goretti Sanmartín, respondeu ás críticas formuladas por Partido Popular e Partido Socialista sobre a situación do turismo e do aeroporto Rosalía de Castro, defendendo o traballo desenvolvido polo Concello e reclamando unha maior implicación da Xunta de Galicia na planificación aeroportuaria.
Durante unha atención aos medios, a rexedora asegurou que o goberno local leva “traballando en solitario” na captación de novas rutas aéreas, unha tarefa na que, segundo indicou, non contou coa colaboración suficiente doutras administracións. Neste sentido, apelou directamente á Xunta para que asuma un papel máis activo: “É a Xunta de Galicia a que se ten que poñer á fronte e poñerse as pilas”.
Sanmartín destacou que o Concello está a destinar “unha cantidade importante” de recursos para impulsar novas conexións aéreas, apostando pola diversificación de destinos e compañías. A alcaldesa sinalou que esta estratexia busca reforzar o papel do aeroporto compostelán e consolidar a súa conectividade.
A rexedora tamén fixo fincapé na necesidade de avanzar cara a unha política aeroportuaria con visión de conxunto, subliñando que “todo o mundo ten moi claro de quen é a responsabilidade de ter unha perspectiva de país”. Neste marco, insistiu na importancia da cooperación institucional, ao tempo que asegurou que o Concello “leva tendendo a man” para favorecer esa coordinación entre administracións.
En relación coa enquisa impulsada por Incolsa, Sanmartín aclarou que se trata dun instrumento vinculado ao plan estratéxico de turismo —e non ao de sustentabilidade— e que ten como finalidade coñecer en profundidade a situación turística da cidade. Segundo explicou, os resultados permitirán orientar futuras decisións nun espazo de traballo compartido entre distintas administracións.
A rexedora municipal non concretou os prazos para a finalización deste estudo, pero sinalou que o obxectivo é dispoñer de datos actualizados que faciliten a adopción de medidas conxuntas no ámbito turístico.
