A Deputación da Coruña sacou a licitación por 1.125.300 euros a adquisición dun inmoble co obxectivo de habilitar unha nova sede institucional en Santiago de Compostela. O futuro espazo, segundo informou o organismo provincial, contará cunha oficina tributaria, zonas de coworking, un auditorio e unha aula de formación.
A iniciativa pretende reforzar a presenza da administración provincial na capital galega e ampliar a carteira de servizos dispoñibles para a veciñanza e o tecido económico da comarca compostelá. O presidente da institución, Valentín González Formoso, sinalou que esta nova infraestrutura permitirá “achegar a Deputación á cidadanía, ofrecer servizos útiles e crear espazos abertos á actividade económica, social e cultural”.
Segundo as previsións trasladadas pola Deputación, o edificio funcionará como punto de atención tributaria, ao tempo que ofrecerá espazos para iniciativas emprendedoras e actividades formativas. A incorporación dun auditorio permitirá tamén acoller actos institucionais e eventos vinculados á programación económica e social impulsada pola entidade provincial.
