A Real Academia Galega de Ciencias e a Universidade de Santiago de Compostela celebraron esta mañá un acto ‘in memoriam’ en lembranza do académico José Antonio Redondo López, falecido o pasado mes de xuño. O encontro tivo lugar na Facultade de Ciencias Económicas e Empresariais da USC, centro no que desenvolveu boa parte da súa carreira como profesor e vicedecano.
O acto foi aberto polo reitor da Universidade de Santiago, Antonio López, e contou coa participación do decano da facultade, Xoán Ramón Doldán; do presidente da RAGC, Juan Lema; do presidente do Consello de Contas, Juan Carlos Aladro; do director xeral do Instituto Galego da Vivenda e Solo, Heriberto García; da académica da RAGC María Loureiro, catedrática da USC; e da profesora de Economía Financeira e Contabilidade Loreto Fernández, encargada dunha das intervencións de peche.
Unha traxectoria vencellada á USC e á xestión pública
Natural de Lugo, José Antonio Redondo cursou Ciencias Económicas, Comerciais e Políticas na USC entre 1969 e 1974, formando parte da terceira promoción. Na institución compostelá participou na creación da licenciatura de Ciencias Empresariais, foi director constituínte do Departamento de Economía Financeira e Contabilidade e director do Máster de Renovación Urbana e Rehabilitación. A súa especialización en finanzas levouno a introducir os primeiros estudos sobre Teoría do Investimento Financeiro na universidade.
Tras unha estadía académica na Universidade de California, orientou a súa investigación á aplicación da análise espectral ao comportamento dos valores bolsistas, unha liña pioneira que foi sinalada como precedente da actual intelixencia algorítmica aplicada aos mercados financeiros. En 1987 obtivo a Cátedra na USC, iniciando unha etapa de intensa actividade investigadora centrada na análise dos fluxos financeiros, na que promoveu a formación dun equipo de investigadores novos. Ao longo da súa carreira publicou numerosos estudos, monografías e guías de referencia no ámbito da economía.
Do ensino universitario á responsabilidade institucional
En 1993 iniciou unha nova etapa profesional na Administración pública galega, colaborando como asesor en Sogama e na Consellería de Obras Públicas e Urbanismo. En 1995 foi nomeado director xeral do Instituto Galego da Vivenda e Solo, cargo que exerceu ata 2005, período no que se salientou o impulso á vivenda pública e ás políticas de rehabilitación.
De regreso á universidade, participou en numerosos órganos e consellos de ámbito autonómico, como a Comisión Superior de Urbanismo de Galicia, o Instituto Galego de Promoción Económica, Xestur, o Instituto Galego de Estatística, o Consello Galego da Xuventude, o Consello para a Promoción da Igualdade do Home e da Muller de Galicia, e a Fundación Catedral de Santiago.
En 2015 foi nomeado conselleiro maior do Consello de Contas de Galicia, responsabilidade que exerceu ata 2023. Durante este mandato promoveuse unha reforma lexislativa orientada a reforzar a fiscalización das administracións públicas e a loita contra a corrupción, ampliando o papel do Consello na xestión pública.
COMPROMISO ACADÉMICO
Redondo ingresou na Real Academia Galega de Ciencias en 2018. Durante o acto, o seu presidente, Juan Lema, lembrou que no discurso de ingreso o académico abordara a importancia crecente das Finanzas do Comportamento e advertira do impacto das noticias falsas no sistema financeiro, reflexións que cualificou de especialmente vixentes. Lema destacou tamén a súa implicación coa institución e a súa capacidade para crear consensos, sinalando que “o seu legado perdura nunha forma de facer Academia baseada no rigor, o diálogo e o servizo”.
Pola súa banda, a profesora Loreto Fernández subliñou que “en 2023 retirouse, deixando un legado académico, institucional e humano de enorme valor”, lembrando a súa figura como docente, investigador e servidor público.
