O Concello de Santiago confirmou que os seus servizos técnicos, xunto coa Universidade de Santiago, están a preparar a documentación necesaria para xustificar a axuda europea concedida ao proxecto ‘Entre Sar e Sarela’, despois de que exista risco de perda de financiamento por non cumprir o prazo máximo de execución, fixado no 31 de decembro de 2025.
A situación foi avanzada por El Correo Gallego, que advertiu de que Santiago podería quedar sen parte dos fondos europeos Next Generation, ao non executarse na súa totalidade as actuacións incluídas nun proxecto que contaba cunha subvención do 95% do seu orzamento. Fontes municipais confirmaron que o Concello solicitou unha prórroga no marco da Convocatoria de axudas para o impulso da renaturalización de cidades de 2022, integrada no Plan de Recuperación, Transformación e Resiliencia–Next Generation EU, pero a resposta foi negativa.
Ante esta decisión, o Goberno local indicou que traballa agora na xustificación técnica e administrativa da axuda, un proxecto que inclúe máis dunha ducia de actuacións en distintos puntos da cidade. Segundo Raxoi, xa se aprobou a estratexia municipal de infraestrutura verde e adaptación ao cambio climático, e executáronse as obras de renaturalización da Lagoa de Cornes, do Xardín Botánico e do Monte Viso, ademais dos proxectos de comunicación e participación cidadá esixidos pola Unión Europea.
O Concello tamén destacou o avance das obras do Barrio Verde de Pontepedriña, que, segundo indicou, progresan de maneira notable e permitirán completar a actuación conforme ao proxecto inicial, cunha mellora do espazo público do barrio. Pola súa banda, en relación coa Lagoa do Auditorio, o Goberno municipal explicou que a súa tramitación foi complexa, ao precisar diversos informes sectoriais, e que a primeira licitación quedou deserta. Asegurou, non obstante, que o documento técnico xa está aprobado e que se analizan alternativas para a súa execución.
CRÍTICAS DA OPOSICIÓN
A situación xerou reaccións nos grupos da oposición. A concelleira do Grupo Municipal Popular, Olaya Otero, reclamou “transparencia e explicacións” sobre as razóns do atraso na execución das obras e sobre o importe que deberá achegar o Concello con fondos propios para completar o proxecto. Otero lembrou a perda previa de dous millóns de euros destinados á Praza de Abastos e afirmou que o actual escenario obriga aos veciños a financiar con impostos actuacións como as de Pontepedriña.
Na mesma liña, a concelleira non adscrita Mila Castro considerou que a alcaldesa debe aclarar a situación dun proxecto que contaba cunha subvención europea de 3,6 millóns de euros obtida no mandato anterior. Castro criticou que, tras case tres anos, non se adxudicasen as obras da Lagoa e que siga sen resolverse o financiamento da humanización de Amor Ruibal, advertindo de que podería tratarse da segunda subvención europea perdida polo actual Goberno local.
Desde o Grupo Municipal Socialista, a concelleira Marta Abal sinalou que a suposta herdanza recibida polo executivo municipal non foi aproveitada, ao seu xuízo, por unha falta de capacidade de xestión. Abal puxo o foco en canto diñeiro podería perderse finalmente da axuda europea e que debería ser asumido polo Concello, sumándose, segundo indicou, aos fondos xa perdidos para a modernización da Praza de Abastos e a outras necesidades pendentes da cidade.
