As concelleiras non adscritas do Concello de Santiago de Compostela mantiveron este luns unha reunión co goberno local co obxectivo de abrir, nas vindeiras semanas, a negociación dos orzamentos municipais para este ano. Tras o encontro, o grupo expresou as súas dúbidas sobre algunhas das previsións de ingresos incluídas no borrador das contas, en especial a referida á recadación por multas de tráfico, que contempla un incremento do 173%.
O concelleiro Gonzalo Muíños reclamou a elaboración de informes técnicos que xustifiquen esa estimación, que cualificou de “esaxerada” e que, segundo indicou, “non responde a outro criterio que o recadatorio”. Nesta liña, avanzou que as non adscritas non están dispostas a apoiar unhas contas que incorporen esa previsión sen unha base técnica contrastada.
Muíños deu por descartada a posibilidade de avalar o documento orzamentario se se mantén ese aumento, ao considerar que non existen datos que o sustenten. “Non imos avalar, de ningún modo, un incremento así na recadación de multas”, afirmou, antes de engadir que, segundo a información dispoñible, “non sinalan ningún incremento do número de accidentes nin hai constancia de informes que falen de excesos de velocidade”.
Durante a reunión co Executivo local, as non adscritas tamén puxeron o foco noutras partidas de ingresos, como as derivadas das novas licenzas de taxi ou da taxa turística. Ao respecto, Muíños lembrou que se trata de conceptos “xa previstos” nas contas de 2025 que, segundo sinalou, “non se chegaron a materializar”.
No caso concreto da taxa turística, o edil indicou que solicitaron un informe económico que permita comprobar se os ingresos estimados son sostibles, tendo en conta que a súa aplicación comezou no mes de outubro. “Queremos saber se as cifras debuxadas polo goberno local son ou non son pura maquillaxe para que ingresos e gastos cadren”, sostivo.
A pesar das críticas, Gonzalo Muíños asegurou que as concelleiras non adscritas afrontan a negociación “coa mellor das vontades” e coa intención de chegar a un acordo co goberno municipal. Con todo, advertiu de que non darán o seu apoio a un orzamento que considere “inventado, con partidas sobredimensionadas e investimentos previstos que non chegan a materializarse”.
