O Concello de Santiago de Compostela formalizou a adxudicación do contrato mixto de iluminación de Nadal á empresa Iluminaciones Santiaguesas SL, única candidata que concorreu ao proceso e que cumpriu cos requisitos establecidos no prego de condicións.
O contrato abrangue dúas campañas de Nadal consecutivas e inclúe o deseño, subministro, instalación, posta en funcionamento, mantemento e posterior retirada dos elementos decorativos en réxime de alugueiro. O orzamento total do servizo ascende a 568.700 euros con IVE, distribuídos en 241.697,50 euros en 2025, 284.350 euros en 2026 e 42.652,50 euros en 2027, correspondentes ás tarefas de desmontaxe e peche do contrato. Sen impostos, a oferta económica queda fixada en 470.000 euros.
Segundo explicou o Concello, o obxectivo é instalar un alumeado ornamental que contribúa a crear unha atmosfera cálida e acorde coa identidade da cidade, “coa intención de favorecer o goce das festas e dinamizar a actividade comercial”. A proposta inclúe arcos luminosos, elementos singulares, iluminación de árbores e photocalls en distintos espazos públicos de Compostela.
O proxecto centrarase no Casco Histórico e no Ensanche, principais áreas comerciais e de tránsito da capital galega, mais tamén se estenderá a outros puntos do municipio. A empresa comprométese a garantir valores de luminancia axeitados, emisións controladas e sistemas intelixentes de regulación, de xeito que se eviten deslumeamentos e exceso de luz durante as noites.
A contratación realizouse a través da Concellería de Deportes, Relacións Veciñais, Festas, Rural e UMAD, dirixida por Pilar Lueiro, quen subliñou que esta adxudicación “permitirá contar cun alumeado de Nadal coidado e respectuoso, pensado para acompañar á cidadanía e ao comercio durante o período festivo”.
