O Concello de Santiago de Compostela prepara un novo informe técnico para solicitar que a cidade sexa declarada zona de mercado residencial tensionado, unha figura recollida na Lei estatal de vivenda que permitiría limitar o prezo dos alugueiros en áreas con alta presión residencial.
A portavoz do Goberno local, Míriam Louzao, confirmou en rolda de prensa que “o Concello fará todo o que sexa necesario para superar os atrancos que está a pór a Xunta” e que a vontade do executivo compostelán é “máxima” para conseguir a declaración.
A decisión chega despois de que a Consellería de Vivenda e Planificación de Infraestruturas desestimase o recurso presentado polo Concello, tras dar por desistida a súa solicitude inicial o pasado agosto. O departamento autonómico argumentara daquela que Raxoi non respondera “de forma válida” ao requirimento de completar a documentación.
En setembro, o Goberno local mantivo unha reunión cos técnicos do Instituto Galego de Vivenda e Solo (IGVS), na que se acordou revisar a memoria xustificativa e o plan de medidas correctoras para adaptalos ás demandas do organismo autonómico. O novo documento incluirá só datos procedentes de fontes oficiais, eliminando os achegados por fontes non oficiais, e ampliará determinadas cuestións “que a lei non pedía”, segundo Louzao.
A portavoz municipal recoñeceu que aínda non se pode determinar o prazo de finalización do informe, xa que “unha vez remitido, será outra administración a que teña que dar resposta”.
Louzao concluíu asegurando que “Santiago xa sería zona tensionada se o PP desde a Xunta non puxese obstáculos, pero seguiremos traballando para que iso sexa unha realidade canto antes”.
