O Concello de Santiago e a Unión de Profesionais e Traballadores Autónomos (UPTA) estudarán posibles vías de colaboración para “apoiar e mellorar” o asesoramento a este colectivo na capital galega. Así o acordaron este venres nunha reunión entre a alcaldesa compostelá, Goretti Sanmartín, a tenienta de alcaldesa e concelleira de Dereitos e Servizos Sociais, Promoción Económica e Xuventude, María Rozas, e o presidente de UPTA, Eduardo Abad.
María Rozas explicou que desde o seu departamento avalían “posibles vías de colaboración” con UPTA para asesorar e formar autónomos atendendo tamén a unha perspectiva social xa que “está a crecer sensiblemente” o número de persoas migrantes que son traballadoras por conta propia. Rozas explicou que esta é unha liña de traballo na que “xa están a avanzar”, centrados “especialmente no emprendimiento feminino, verde e social” e cren que as administracións “deben de ir da man de organizacións” como a UPTA.
Santiago, segundo detallou Abad, pechou o mes de marzo con 7.208 traballadores autónomos, 42 máis dos que había no mes de marzo de 2021. Esta “evolución positiva” contrasta cos “datos preocupantes” de Galicia, que no mesmo período de tempo “perdeu case 2.500 autónomos”. No conxunto da comunidade hai 205.085 traballadores por conta propia, fronte ás 207.552 que había en marzo de 2021. Eduardo Abad remarcou que o 40 % dos autónomos de Santiago pertencen aos sectores da hostalaría e o comercio. A continuación, incidiu en que o 20 % dos autónomos composteláns, máis de 1.400, teñen traballadores asalariados.
