A Corporación de Santiago aprobou por unanimidade a moción presentada polo concelleiro non adscrito Gonzalo Muíños para optimizar a competitividade do aeroporto Rosalía de Castro e blindar o emprego afectado polo peche da base de Ryanair. O texto insta ao Ministerio de Transportes, á Xunta de Galicia e a AENA a activar mecanismos de acompañamento laboral e a negociar novas conexións que compensen os recortes de operadoras. A proposta inclúe promoción en mercados emisores, avance no mapa de rutas acordado no Comité de Coordinación Aeroportuaria de Galicia e reforzo da interlocución coas compañías para captar novas operadoras.
No arranque do debate desta proposta, Muíños puxo o foco no impacto social do anuncio: máis de cen familias poderían quedar sen ingresos e 135 persoas de terra afrontan un panorama de incerteza. Defendeu un plan específico de protección do persoal e unha estratexia conxunta para que o aeroporto “despegue como principal infraestrutura galega”. O autor da moción aceptou un matiz do PP para estender a referencia ao persoal de voo, ademais do de terra.
O debate estivo marcado polos reproches a María Baleato (PP) por parte dos grupos do Goberno. María Rozas (Compostela Aberta) reclamou unha mensaxe común e censurou o ton do Partido Popular: “é unha pena que vostede veña a este Pleno a lernos o argumentario do Partido Popular“, dixo, lembrando que a conectividade aérea é clave para a diversificación económica de Santiago e que todas as administracións deben implicarse. A concelleira de Turismo, Míriam Louzao (BNG), criticou a “visión máis simplista” da bancada popular e afeou a repetición do relato de que o Goberno local “quere unha cidade pechada”: “empeza a ser un pouco cansina a cantinela… non significa que queiramos poñer unha cancela en Lavacolla”, replicou.
Desde o grupo socialista, Gumersindo Guinarte advertiu de que a decisión de Ryanair responde a unha política empresarial de concentración en aeroportos maiores, rexeitou que se atribúa o peche ás taxas de Santiago e pediu non “blanquear a actuación” da compañía. Sinalou, ademais, a asimetría de apoios públicos doutros territorios e reclamou liderado galego para a coordinación aeroportuaria.
Pola súa banda, María Baleato defendeu o voto favorable do PP, cualificou o anuncio de “terrible nova” e urxiu a que AENA e a empresa resolvan o conflito. Aproveitou para cuestionar a xestión municipal e reivindicar “un Santiago máis aberto ao mundo“, ao tempo que puxo o foco en que tamén haberá traslados e despedimentos en tripulacións e en emprego indirecto ligado ao aeroporto. As súas intervencións provocaron as réplicas máis duras do resto de grupos, que lle reprocharon “reducir o problema” e “repetir un relato” alleo ás propostas concretas para o persoal afectado e para a conectividade.
No peche, a alcaldesa ‘Goretti Sanmartín’ salientou a mensaxe unánime de solidariedade co cadro de persoal e apelou a traballar con “todas as administracións e co tecido socioeconómico” para definir especialización e complementariedade do sistema galego. Lembrou que o Comité de Coordinación Aeroportuaria está convocado para o próximo venres 3 de outubro e pediu “deixar a un lado prexuízos e estereotipos” para avanzar nun acordo estable.
