A Xunta de Galicia e o Concello de Santiago manterán unha reunión o vindeiro 2 de setembro para abordar a posible declaración da cidade como zona de mercado residencial tensionado. Así o confirmou este martes a conselleira de Vivenda e Planificación de Infraestruturas, María Martínez Allegue, quen expresou a súa confianza en que a cita sexa “produtiva”.
Allegue lembrou que “desde un primeiro momento” o Goberno galego ofreceu colaboración ao Concello, chegando a contactar directamente coa alcaldesa, Goretti Sanmartín, antes de que se presentase o requirimento formal. “O requirimento non foi cumprimentado polo que tivemos que desistir na solicitude”, indicou.
Segundo a conselleira, foi posteriormente cando o Concello de Santiago trasladou á Xunta a súa disposición a celebrar un encontro, que se desenvolverá en clave exclusivamente técnica. O obxectivo será clarificar e analizar os puntos que debe resolver o Concello “se quere ser realmente declarado zona tensionada”.
