O Concello de Santiago urxe á Xunta de Galicia a emitir unha resposta “canto antes” á súa solicitude para declarar a cidade como zona de mercado residencial tensionado, unha medida que permitiría aplicar limitacións nos prezos do alugueiro. A portavoz do goberno local, Míriam Louzao, expresou este mércores a confianza do executivo compostelán en que a resolución será positiva, e advertiu que non se contempla un escenario de rexeitamento.
A petición fora obxecto dun requirimento de emenda por parte da administración autonómica, ao que o Concello deu resposta o pasado 23 de xullo, defendendo o diagnóstico inicial realizado polos seus servizos técnicos e incorporando modificacións puntuais para adaptarse ás esixencias da Xunta. Así o detallara esta semana o concelleiro de Urbanismo, Iago Lestegás, quen asegurou que os axustes non afectan ao fondo da cuestión e que os datos achegados confirman o incremento dos prezos da vivenda, o esgotamento da oferta de alugueiro e as dificultades de acceso para a poboación local.
En paralelo, a conselleira de Vivenda e Planificación de Infraestruturas, María Martínez Allegue, declarou este martes que os seus técnicos están a analizar a documentación e negou que se estean a bloquear solicitudes de zonas tensionadas. “Cando se fan ben as cousas e se envían correctamente os documentos, non hai ningún problema”, afirmou.
Ao ser preguntada sobre estas declaracións, Louzao reiterou o compromiso do goberno local coa súa proposta e subliñou que o problema da vivenda en Santiago é urxente. “Os datos son máis que evidentes e demostran a situación de tensión do mercado residencial. Por iso, esperamos que a Xunta resolva a solicitude canto antes e de forma positiva”, declarou. A portavoz engadiu que desde o executivo municipal non se valora outra posibilidade que non sexa a aprobación da medida.
O recoñecemento de Santiago como zona tensionada permitiría aplicar mecanismos de control temporal dos prezos do alugueiro, unha das ferramentas previstas pola Lei estatal polo Dereito á Vivenda, á que o Goberno galego se ten oposto politicamente, mais que debe aplicar se os concellos cumpren os requisitos e formalizan as solicitudes conforme ao procedemento legal.
