A alcaldesa de Santiago, Goretti Sanmartín, xustificou este luns que o prazo para a entrada en vigor da chamada taxa turística aprazouse ata o 1 de outubro, neste sentido, defendeu que “hai que ter xenerosidade e escoitar ao sector”. Cabe lembrar que nun encontro aberto aos encargados do cobro deste tributo, o sector hostaleiro mostrou a súa oposición á súa posta en marcha en agosto, xa que este e setembro son os meses de máis traballo para estes profesionais.
Goretti Sanmartín indicou que este venres tivo lugar unha xunta de goberno extraordinaria na que se aprobou o texto definitivo da ordenanza da taxa turística, tras analizar o sete alegacións presentadas ao proxecto inicial, catro delas co mesmo contido. Neste contexto, lembrou que o Concello presentou ata dous proxectos de lei á Xunta, que finalmente aceptou, “a pesar de que non coa fórmula que propuña Raxoi”.
“Considero que co fin deste proceso terémonos que felicitar colectivamente por esta medida de xustiza, que responde a directrices estratéxicas do Concello de Santiago aprobadas en diferentes momentos pero que ata o momento non se concretaron“, destacou. Con todo, sobre as críticas do sector hostaleiro e as reticencias á aplicación desta taxa, a rexedora compostelá relacionounas coa súa postura “pioneira” e insistiu en que “dentro duns anos ninguén discutirá sobre isto”.
