A taxa turística que o Concello de Santiago pretende aplicar aos visitantes podería entrar en vigor este mesmo verán, segundo avanzou este xoves a portavoz do goberno municipal e concelleira de Capital Cultural, Turismo, Educación e Memoria Histórica, Míriam Louzao. A previsión que manexa o executivo local é que esta nova ordenanza estea en funcionamento entre finais de xullo e principios de agosto, sempre que se cumpran os prazos establecidos e se resolvan sen complicacións os posibles trámites derivados das alegacións.
Durante a súa intervención nunha rolda de prensa, Louzao foi preguntada polos medios sobre a viabilidade de que a nova taxa se poida aplicar xa este verán, tendo en conta que o documento se atopa en fase de exposición pública. A edila confirmou que o proceso continúa co calendario previsto: “Agora son 30 días de exposición e despois ten que volver ao pleno municipal a súa aprobación definitiva”, explicou.
Neste sentido, apuntou que o goberno local aspira a levala ao pleno de xullo, o que permitiría a súa entrada en vigor nas datas que manexan. En canto á posibilidade de que se presenten alegacións ao texto, Louzao afirmou que non pode facer predicións sobre se haberá ou non cuestións que dificulten o procedemento, pero amosou confianza en que se poidan resolver a tempo para que o trámite non sufra atrasos.
“Como se fai con calquera outra ordenanza”, engadiu, destacando que o procedemento administrativo será o habitual e que o executivo municipal está preparado para dar resposta aos posibles comentarios ou suxestións que cheguen durante o período de exposición pública.
A implantación da taxa turística en Compostela forma parte dun debate aberto nos últimos anos sobre a xestión do turismo na cidade, con posturas diversas entre os sectores implicados. De aplicarse nos prazos indicados, Santiago converteríase nun dos primeiros municipios galegos en contar cun mecanismo deste tipo, que busca compensar o impacto do turismo na cidade e contribuír ao financiamento de servizos e iniciativas vinculadas á súa xestión.
