O Concello de Santiago entregou as distincións do Sistema Integral de Calidade Turística Española en Destino (SICTED) a 131 empresas e servizos turísticos do municipio, cinco máis que o ano pasado e máis do dobre das 60 que se conseguiron no 2018, cando se recuperou o traballo neste sistema de calidade.

Segundo trasladou o mesmo Concello, Turismo de Santiago continúa deste xeito “fomentando a calidade no sector turístico da cidade”, nun proxecto no que conta co apoio da Deputación da Coruña. A concelleira de Turismo, Míriam Louzao, destacou no acto, celebrado este mércores na Casa dás Asociacións de Cornes, que “a calidade é unha ferramenta necesaria para desarollar un novo modelo turístico na cidade, que aposte máis polo valor engadido que polas meras cifras”.

Míriam Louzao tamén fixo unha mención especial ao esforzo que se está facendo nas redes sociais do SICTED para mellorar a notoriedade na contorna dixital, tanto de Compostela como destino como de cada unha das empresas distinguidas. Este esforzo obtivo o segundo premio á Mellor visibilidade do destino en medios, entregado en Fitur.

O deputado provincial, Xosé Penas, fixo referencia ao patrimonio, que implica “o respecto máximo polo que nos rodea; o patrimonio inmaterial dun país milenario e mesmo o medio ambiente e a paisaxe que nos converten nun territorio singular”.