A alcaldesa de Santiago de Compostela, Goretti Sanmartín, instou este venres á Xunta de Galicia a asumir a coordinación dun comité de rutas para os tres aeroportos galegos. A rexedora defendeu a necesidade de establecer unha estratexia conxunta para evitar que a falta de planificación beneficie a outras infraestruturas aeroportuarias fóra de Galicia.
REIVINDICACIÓN TRAS A REUNIÓN DO COMITÉ AEROPORTUARIO
As declaracións de Sanmartín producíronse en resposta ás preguntas dos medios tras a celebración, este xoves, dunha reunión do Comité de Coordinación Aeroportuaria de Galicia. A alcaldesa subliñou que a Xunta é a administración que ten a competencia en materia de transporte e que, por tanto, debería liderar este comité de rutas.
“Levamos moito tempo, reunión tras reunión, reclamando que haxa coordinación. E non somos só nós, senón moitas persoas e entidades”, asegurou. “Se non hai unha estratexia conxunta entre os tres aeroportos galegos, xa sabemos quen gaña: un aeroporto que está fóra do noso país“, engadiu.
Sanmartín tamén lembrou que en anteriores ocasións a Xunta tentou asumir esta competencia e convocar aos concellos implicados. “Pode saír mellor ou peor, pero intentouse coordinar con visión de país“, apuntou.
Criticou que o goberno autonómico “non pode simplemente deixar que cada concello pelexe polo seu”. “Se esa é a estratexia, entón para que necesitamos unha Xunta de Galicia? Para que existen as competencias en transporte?”, preguntouse.
Segundo a rexedora compostelá, o modelo de traballo debe basearse nunha “fronte común” que permita que os tres aeroportos galegos se reforcen mutuamente en lugar de competir entre si. “A visión localista de que cada concello decida o seu non encaixa coa nosa idea de futuro para Santiago e para Galicia”, insistiu.
Por último, Sanmartín apelou á responsabilidade das institucións galegas para definir unha estratexia aeroportuaria que beneficie a Galicia no seu conxunto. “Cada un debe decidir que papel quere xogar: estar a favor dos intereses de Galicia e dos seus aeroportos, ou permitir que a decisión se tome fóra das nosas fronteiras“, concluíu.
