A xunta de goberno local de Santiago de Compostela aprobou este luns o proxecto de orzamentos municipais, que agora pasa á comisión informativa de Facenda e espera ser aprobado nun pleno a final de mes.
A portavoz do executivo, Míriam Louzao, informou sobre a decisión e anunciou que o documento será presentado en rolda de prensa polo edil Manuel César Vila. Segundo indicou, trátase dun orzamento equilibrado cun total de 146 millóns de euros, o que representa un incremento do 2,6% respecto ao exercicio anterior. Destacou ademais que o gasto corrente ascende a 130 millóns de euros, mentres que os investimentos reais alcanzan os 13 millóns.
Entre as liñas estratéxicas da nova planificación económica municipal, Louzao salientou as accións previstas en vivenda, atención a colectivos vulnerables, infraestruturas, medio rural, vías urbanas, equipamentos, instalacións deportivas, cociña central para os comedores escolares e sustentabilidade ambiental.
A portavoz subliñou que o proxecto foi acordado co Grupo Municipal Socialista, asegurando que ambas forzas manteñen un compromiso para facilitar a súa aprobación no pleno. En resposta ás preguntas sobre a recente ruptura dos socialistas en Raxoi, producida despois da formalización do acordo orzamentario, Louzao reiterou que se dialogou con todos os membros do Grupo Municipal. Neste sentido, expresou a súa confianza en que non impedirán que os orzamentos sigan adiante.
