A alcaldesa de Santiago, Goretti Sanmartín, acompañada pola concelleira de Turismo, Míriam Louzao, e polo concelleiro de Facenda, Manuel César, mantivo unha reunión co equipo da USC co que o Concello traballa na elaboración da ordenanza do imposto sobre estancias turísticas. O obxectivo, detallou o consistorio municipal, é presentarlle un texto “o máis pechado posible” ás asociacións do sector turístico nas próximas semanas.
Así, na reunión celebrada en Raxoi analizaron un primeiro borrador elaborado polo catedrático en Dereito Financeiro e Tributario César García Novoa sobre o que traballará conxuntamente con persoal municipal de Tesouraría. Entre as cuestións que se están pechando inclúense aspectos como a periodicidade das autoliquidacións ou a composición da comisión municipal de asesoramento e seguimento da implementación deste imposto. A colaboración entre a USC e o Concello forma parte do convenio para a consecución dun Pacto Local por un Turismo Sustentable, asinado no marco do Plan de sustentabilidade turística que se desenvolve en colaboración coa Xunta e o Ministerio de Industria e Turismo.
