¡O Arcebispado de Santiago aprobou o orzamento para 2025 que ascende a máis de 25 millóns de euros e prevé que os fieis lle doen un 31% máis que en 2024. O orzamento, aprobado no Consello de Asuntos Económicos da Diocese que estivo presidido polo arcebispo, Franciso Prieto, proxecta a “consolidación da Diocese” á situación de prepandemia.
Desta forma, prevén un incremento do 31,11% nas achegas dos fieis respecto a 2024, representando case o 40% dos recursos. Ademais, observan un aumento do 6,47% nas doazóns do Fondo Común Interdiocesano, o que supón case un 30% dos recursos.
En canto aos ingresos de patrimonio, proxéctase unha redución mínima do -1,49% debido ao axuste en ingresos financeiros e un aumento significativo de máis do 60% nas subvencións. Así mesmo, esperan un incremento do 74,97% na axuda á Igrexa Universal e un 52,29% en Actividades Pastorais. Por outra banda, estiman un aumento do 188,45% en gastos extraordinarios relacionados con programas de rehabilitación e conservación de edificios.
CONVENIO CONCELLO DE AMES
Por outra banda, este xoves o alcalde de Ames, Blas García, e o arcebispo de Santiago asinaron un protocolo xeral de actuacións para regularizar a situación física e xurídica de varios inmobles e para optimizar o seu aproveitamento para unha mellor satisfacción dos obxectivos de promoción cultural, deportiva e relixiosa.
