A sede do Colexio oficial da Arquitectura Técnica da Coruña (COATAC) tramitou 128 visados de novas vivendas en Santiago de Compostela de xaneiro a setembro deste ano, 23 máis que no mesmo período do ano anterior. Deste xeito, rexístrase un repunte do 21,9 por cento. Segundo os datos do Gabinete Técnico do Colexio oficial da Arquitectura Técnica da Coruña, o visado de novas vivendas a construír en toda a provincia da Coruña estableceu un destacado crecemento do 36,36%.

As oficinas da entidade rexistraron no nove primeiros meses deste ano un total de 1.380 visados de vivendas a construír en toda a provincia da Coruña, fronte ás 1.012 vivendas do mesmo período de 2023. Neste caso, desde que comezou a década, por primeira vez supérase a barreira das 1.300 vivendas visadas no nove primeiros meses do ano.

BOAS PERSPECTIVAS

Nun comunicado, o presidente do Colexio oficial da Arquitectura Técnica da Coruña, Carlos Mato, sinalou que prevé “bos tempos” para o sector da construción na capital coruñesa. O COATAC augura que as rehabilitacións manterán o seu protagonismo animadas polos programas de axuda para a rehabilitación enerxética de edificios e vivendas procedentes dos Fondos Europeos Next Generation. “Están a ser fundamentais para a renovación do noso parque de vivendas”, destaca Carlos Mato.

O máximo representante dos profesionais da Arquitectura Técnica da Coruña tamén prevé un incremento da actividade de obra nova, que chegará da man das novas promocións previstas na cidade de Santiago de Compostela. “Constatamos a través da sede do COATAC en Compostela que esta cidade está a rexistrar un incremento en novos proxectos de promocións de vivenda tanto de iniciativa pública como privada”.

Pola súa banda, a entidade sinala que outro factor que dinamizará a curto e medio prazo o sector da construción será a baixada do prezo do diñeiro.