O Multiusos Fontes do Sar de Santiago de Compostela será o escenario, o vindeiro 23 de febreiro a partir das 15:00, da segunda edición do Campionato 3×3 USC-Obradoiro, unha competición deportiva dirixida á comunidade universitaria da Universidade de Santiago de Compostela. Tras a acollida da primeira edición, a organización mantén aberto o prazo de inscrición, de balde, até o 13 de febreiro a través dun formulario electrónico.
O campionato contará con dúas categorías, masculina e feminina, cun máximo de 32 equipos por categoría. Cada grupo deberá estar formado por entre tres e cinco integrantes, e a participación está restrinxida a membros da comunidade universitaria da USC. Como principal novidade desta edición, a competición ábrese á participación de persoas procedentes de ambos os campus, Santiago e Lugo, e inclúe transporte gratuíto desde o Campus de Lugo até o recinto deportivo compostelán.
Para formalizar a inscrición, todas as persoas participantes deberán rexistrarse previamente como usuarias da Área Deportiva da USC. A persoa que exerza a capitanía do equipo será a responsable de tramitar a inscrición en liña e de xestionar, a través da aplicación da universidade, o envío das invitacións ao resto dos compoñentes, que deberán completar o proceso mediante a ligazón recibida no seu correo electrónico.
A organización tamén prevé a posibilidade de participación para aquelas persoas que non conten cun equipo pechado, a través dunha bolsa de persoas xogadoras. Ademais, unha vez completado o rexistro do equipo e dos seus integrantes, poderá realizarse a inscrición no Campionato de Triplas, no que só poderá participar unha persoa por equipo.
A celebración desta segunda edición consolida esta cita deportiva no calendario universitario e reforza a colaboración entre a USC e o Obradoiro no fomento da práctica deportiva entre o alumnado.
