A SD Compostela regresou de baleiro da súa visita ao Estadio Novo Ganzábal, onde caeu por 2-1 ante a UP Langreo a pesar de asinar unha actuación destacada. O conxunto santiagués conseguiu adiantarse no marcador antes do descanso, pero dous goles do equipo local, un deles nos minutos finais, fixeron que os de Antón Permuy non puidesen sumar puntos nesta xornada da Segunda RFEF.
O Compos entrou mellor no partido, imprimindo intensidade desde os primeiros minutos. Markitos, que debutaba como titular, foi un dos xogadores máis activos no ataque. As primeiras ocasións non tardaron en chegar, cun disparo de Santi de Prado no minuto 7 e outro intento de Markitos no 20. A ocasión máis clara da primeira metade chegou pouco antes da media hora de xogo, cando un remate de Markitos bateu no pau da portería do Langreo.
O premio ao dominio visitante chegou no minuto 44. Un centro de Markitos ao segundo pau permitiu a Manu Barreiro habilitar de cabeza a Santi de Prado, que marcou a porta baleira para poñer por diante á SD Compostela. Non obstante, a alegría durou pouco, xa que no tempo engadido da primeira metade, o Langreo igualou o encontro cun remate de Breñé tras un saque de esquina.
Na segunda parte, o equipo santiagués seguiu buscando o gol e xerou boas oportunidades para volver adiantarse. Santi de Prado, no minuto 60, dispuxo dun man a man co porteiro local, pero Adrián Torre evitou o tanto. Pouco despois, Ocaña tivo outra opción, pero o seu disparo saíu rozando o pau.
A pesar de que parecía máis preto o segundo gol do Compostela, o Langreo foi quen de golpear nos minutos finais. No minuto 85, un mal despexe na área visitante deixou o balón en boa posición para Lucas Suárez, que conectou un forte disparo á escuadra, imposible de deter para Rabanillo. O 2-1 foi un mazazo para os santiagueses, que aínda intentaron reaccionar nos últimos instantes, pero sen éxito.
