A Facultade de Xeografía e Historia da USC acollerá esta semana dúas actividades centradas na memoria histórica. O mércores 18 de setembro, ás 19h na aula 12, proxectarase de balde o filme O mestre que prometeu o mar, de Patricia Font. A película, que contou con cinco nominacións aos premios Goya, relata a historia real de Antoni Beneiges, un mestre tarraconense fusilado en Burgos en 1936 durante a represión franquista. A historia é revivida a través dos recordos do avó de Ariadna, unha das antigas alumnas de Beneiges.
A sesión de cine será seguida, o xoves 19 de setembro ás 19h na aula 12, dun coloquio sobre a importancia de divulgar a memoria histórica. No debate participarán Paula Carballeira, autora do libro premiado As alumnas; Narciso de Gabriel, especialista na represión do maxisterio; e Coral Piñeiro, cineasta e membro da asociación Memoria e Cinema. O coloquio será moderado por Roque Sanfiz, do Grupo Histagra-USC, e estará aberto ao público, fomentando a participación activa.
Esta actividade enmárcase nas Axudas destinadas ao desenvolvemento de actividades culturais e académicas da Facultade de Xeografía e Historia para o ano 2024, coa colaboración da cooperativa Mazarelos, o grupo de investigación HISTAGRA e a asociación Memoria e Cinema.
