A USC anunciou os seis vídeos galardoados na segunda edición do certame Vémolo Nós, organizado pola Vicerreitoría de Transformación Dixital e Innovación a través do Servizo de Normalización Lingüística. O concurso busca promover o uso do galego na divulgación científica e destacar a interacción co medio rural, a vida universitaria e a lingua galega, combinando orixinalidade e humor.
Na categoría A, centrada na divulgación do coñecemento, o primeiro premio foi para Rocío Manteiga Souto polo vídeo ‘Falando de vacas‘, que amosa a importancia de dar nome ás vacas no rural galego para mellorar o seu benestar. O vídeo finalista nesta categoría, ‘A biotecnoloxía no rural galego‘, de Daniel Abella López e Adrián López Teijeiro, aborda os avances biotecnolóxicos no sector rural.
A categoría B, co lema ‘Descubrindo a USC‘, premiou a Iria Losada Rodríguez pola peza ‘Homenaxe a Carolina‘, dedicada á icónica gata da Biblioteca Concepción Arenal. Como finalista quedou ‘Dende o SEPIU‘, unha creación de Cecilia Álvarez Corujo, David Marante Manteiga, Paula Martínez Collazo e Sara Rodríguez Ourille, que presenta o Servizo de Participación e Inclusión Universitaria cunha estética inspirada nos filmes de espías.
Na categoría C, titulada ‘Protagonista: o galego‘, o galardón foi para Aaron Bennett Kleinschmidt, de Iker Fernández Villar, que retrata a experiencia dun estadounidense aprendendo galego. O vídeo finalista, ‘Falar galego é de balde‘, de Irimia Pérez Sánchez e Manuel García Amado, recompila ditos galegos populares en situacións cotiás.
O concurso Vémolo Nós pretende fomentar o uso do galego como lingua de divulgación científica no audiovisual universitario, ofrecendo materiais de calidade tanto para a docencia como para inspirar o profesorado. Os tres proxectos gañadores reciben 1.500 euros, mentres que os finalistas son premiados con 300 euros cada un.
