A cuarta edición de Camiño Escena Norte, o programa de intercambio cultural que reúne compañías de teatro, danza e artes do movemento de Galicia, Asturias, Cantabria, Euskadi e Navarra, comezará esta fin de semana en Santiago de Compostela co espectáculo Check Out, do asturiano Adrián Conde. O evento terá lugar o venres 13 de setembro, ás 19.00 horas na Praza de Praterías e está dirixido a un público infantil e familiar. En caso de choiva, trasladarase ao Salón Teatro, con entrada libre ata completar aforo.
A proposta Check Out, premiada en Asturias, é unha comedia visual inspirada no cine mudo, que convida ao público a reflexionar sobre a importancia de vivir o presente a través da divertida historia de Eugenio, un mozo de servizo nun hotel.
O domingo 15 de setembro, o programa continúa en Foz, onde se presentará a obra de novo circo By ò Bu. Aproximación al no existir, das compañías navarras Yarleku e El Punto Gunea, ás 21.00 horas na Praza Conde do Fontao. Este espectáculo está dirixido a un público adolescente e adulto e combina movemento, trapecio e palabra para tratar temas profundos como a existencia e a opción de deixar de existir.
Ademais, a programación profesional de Camiño Escena Norte incluirá o encontro Habitación Peregrina PRO, que se celebrará en Lugo do 17 ao 19 de setembro no centro O Vello Cárcere. Este espazo permitirá que as compañías e profesionais do sector cultural compartan coñecementos, establezan contactos e exploren novas oportunidades de coprodución.
Camiño Escena Norte conta co apoio da Xunta de Galicia a través da Axencia Galega das Industrias Culturais, así como coa colaboración da Deputación Provincial de Lugo e Vegalsa-Eroski como patrocinador oficial.
