Santiago de Compostela convértese desde mañá no epicentro dunha das iniciativas máis innovadoras e emocionantes no ámbito da demencia coa celebración da segunda edición do evento Walking the Talk for Dementia (WTD). Esta iniciativa internacional, que combina a experiencia do Camiño de Santiago cun simposio científico de alto nivel, reúne a persoas afectadas pola demencia, científicos, profesionais e familias nunha aposta pola colaboración e a concienciación.
O evento, organizado polo xornalista brasileiro Fernando Aguzzoli-Peres, en colaboración con AGADEA ALZHEIMER SANTIAGO e FAGAL, e co apoio científico da Universidade de Santiago de Compostela, contará coa participación de representantes de 26 países, entre eles Arxentina, Estados Unidos, Australia, Brasil, Inglaterra, Escocia, Irlanda, Canadá, Costa Rica, Perú e Portugal. Entre as figuras destacadas atópanse Paola Barbarino de Alzheimer’s Disease International e Ian Fyfe, editor xefe de Nature Reviews Neurology.
Unha ruta de conciencia e colaboración
A primeira etapa do Camiño de Santiago realizarase mañá, percorrendo o tramo entre Sarria e A Pena, e contará coa participación de 80 persoas nun espazo de diálogo e colaboración internacional. A culminación desta ruta terá lugar o xoves 29 de agosto, cando os camiñantes serán recibidos en Monte do Gozo por máis de 200 familias procedentes de toda Galicia. Está prevista a chegada de autobuses desde Ribeira, A Estrada, Santiago, e doutros lugares como Chantada, A Coruña e Cee.
Este evento non é só unha camiñada, senón un símbolo da necesidade de avanzar xuntos na loita contra a demencia.
CIENCIA E EXPERIENCIA NA LOITA CONTRA A DEMENCIA
Os días 30 e 31 de agosto terá lugar o simposio, que incluirá ponencias e mesas redondas sobre temas clave como a detección temperá da demencia, a creación de comunidades amigables coa enfermidade, e os desafíos na integración do sistema sanitario. A Universidade de Santiago de Compostela (USC) actúa como o principal colaborador científico deste evento.
Taida Sánchez, neuropsicóloga de AGADEA, será unha das voces locais que participará no simposio, compartindo a súa experiencia sobre o Alzheimer nas zonas rurais de Galicia.
Con esta iniciativa, Santiago reafírmase como un punto de encontro internacional para a reflexión e o intercambio de coñecementos na loita contra a demencia, promovendo a creación de solucións innovadoras e solidarias.
