A sociedade civil galega despediu no Museo do Pobo Galego ao historiador Justo Beramendi, un dos fundadores da institución, que faleceu o mércores aos 82 anos. Ás 10.00 horas deste xoves tivo lugar a capela ardente de Beramendi e, tras ela, ás 13.00 horas foi o acto cívico ao que acudiron diferentes personalidades do mundo da cultura, sociedade e política galega.
Entre os presentes estiveron a alcaldesa de Santiago, Goretti Sanmartín, o conselleiro de Cultura, Lingua e Xuventude, José López Campos, o histórico nacionalista Xosé Manuel Beiras, a portavoz nacional do BNG, Ana Pontón, a presidenta do Consello da Cultura Galega, Rosario Álvarez, o presidente da Real Academia Galega, Víctor F. Freixanes, concelleiros do concello de Santiago, entre outros.
O féretro, situado no centro do auditorio do Museo, estivo cuberto coa bandeira galega e, á súa ao redor, diversos centros florais, a maioría deles, adornados con lazos que simulaban a bandeira da comunidade. Durante a cerimonia a presidenta do Museo do Pobo Galego, Concha Losada, tivo unhas palabras para honrar a Beramendi e despedilo na que denominou como “a súa casa”, en referencia á institución.
“Un home que sempre traía os deberes feitos, durante meses, anos e décadas. Traer os deberes feitos e traballar moito onde non che ven, para traballar ben cando estás rodeado doutra xente. Sempre o vimos traballar ben”, enxalzou Losada.
“Non che imos a esquecer, Justo. Só pediamos un pouco máis de tempo”, concluíu, emocionada, Concha Losada. Tras ela, un dos netos de Beramendi tamén dedicou unhas palabras ao seu avó. Posteriormente, foi o fillo maior o que remarcou a “independencia e tenrura” do seu pai e concluíu a súa intervención cun poema.
Ao finalizar, os presentes puxéronse en pé e entoaron, ao compás da gaita, o himno galego. Posteriormente, o cadaleito, precedido por un gaiteiro que entoou o himno do Antigo Reino a medida que abandonaba o Museo, foi levado ao lombo ata ser introducido no coche fúnebre.
A súa necrolóxica, ademais dos seus cargos como presidente do padroado do Museo do Pobo Galego e catedrático emérito de Historia Contemporánea da USC, recolle que foi un “marxista irredento e galego de elección”.
NACIDO EN MADRID: “GALEGO DE ELECCIÓN”
Justo Beramendi, naceu en Madrid estudou Enxeñaría Industrial e Tradución e obtivo un doutoramento en Historia en Santiago de Compostela (USC).
Na universidade galega foi catedrático de Historia Contemporánea e vicerreitor entre 1990 e 1994. A obra de Beramendi engloba estudos de sobre Vicente Risco, Manuel Murguía e Alfredo Brañas, ademais do ensaio ‘De provincia a nación: Historia do galeguismo político’, que lle valeu o Premio Nacional de Ensaio en 2008.
No ano 2012 xubilouse, aínda que non abandonou a actividade intelectual e foi presidente do Museo do Pobo Galego, do que foi cofundador en 1976. Foi membro fundador da Fundación Castelao e director da sección de pensamento político da Fundación Vicente Risco.
