Santiago Ogando é un mozo de 24 anos que naceu en Vigo e se criou entre a cidade olívica e o Ribeiro. Hai xa catros anos decidiu abrir unha conta de Instagram que bautizou co nome de @historiasporlahistoria, na que sube vídeos e contido cultural e histórico. Hoxe en día conta xa con 247 publicacións coas que acadou 81 mil seguidores, unha cifra que require de moito esforzo e que reflicte o gusto dos usuarios polas súas creacións. Como nos conta, dende ben pequeno estivo moi interesado polas súas raíces, polos nomes das rúas, dos edificios e pola historia en xeral. Grazas a ese interese comezou a ler libros e foi adquirindo un coñecemento histórico e cultural moi amplo que na actualidade trata de inculcar aos seus amigos e seguidores.
Graduouse en Medicina na Universidade de Santiago de Compostela e o pasado mes de maio comezou a residencia de Neuroloxía en Vigo. “Durante o encerro pola Covid comecei a escribir nun blog e en Facebook, pero foi nos exames finais de cuarto de carreira, mentres estaba en Santiago, cando decidín abrir a conta en Instagram”, afirma Santiago. O seu obxectivo incialmente era espertar o interese pola historia da nosa comunidade e país dun xeito imparcial, poñendo o foco en temas menos coñecidos ou facetas interesantes de personaxes famosos, unha misión que mantén ata hoxe.
O creador de contido afirma, moi orgulloso, que a súa estadía de cinco anos en Compostela influíu moito neste proxecto, “Santiago é unha cidade na que esteas na rúa na que esteas, estás impregnado de historia. Cada pedra, cada edificio e cada rúa oculta unha historia detrás, e perderse pola zona vella inspira moito”. De feito, un dos seus vídeos favoritos, que lembra con moito agarimo, é o que fala sobre a orixe da frase de “El que se fue a Sevilla perdió su silla“.
Ogando conta que esta coñecidísima frase ten a súa orixe en Compostela. “Remontándonos ao século XV, había dous arcebispos que pertencían á familia Fonseca, un ocupada o posto en Galicia e outro en Sevilla. Nesa época había moitas guerras en Galicia e por iso, o sobriño que ocupaba o posto galego, pediulle ao seu tío que cambiasen os postos durante unha tempada, ata que este conseguise calmar a situación. O cambio realizouse, pero no momento de volver a Galicia, o sobriño estaba tan cómodo en Sevilla que non quixo cambiarse e tiveron que intervir o rei e os seus ministros para solucionar a situación”.
A familia Fonseca, a dos protagonistas da historia, foi moi influínte en Galiza, poñendo nome ao pazo de Fonseca que se atopa na praza do Obradoiro fronte á Catedral e mandando construír a Real Basílica de Santa María a Maior de Pontevedra, dende onde Ogando decidiu contarnos este dato tan curioso.
A pesar de todo o coñecemento que adquiriu durante todos estes anos, para realizar os vídeos e verificar os datos, Santi acude a libros e artigos de internet, así como a libros que ten na casa. Durante a súa estadía na capital galega, acudía á biblioteca da Facultade de Historia para buscar información útil e interesante para as súas creacións. Isto é clave, xa que pretende que a xente que ve os seus vídeos adquira coñecemento fiable e amor pola indagación histórica e cultural, sobre todo por parte dos máis novos, que comezan a ver as redes como un espazo de información e aprendizaxe.
Das 246 publicación, moitas son de historias de sitios aos que viaxa, de reis españois e de romances de séculos pasados, aínda que moitas outras están inspiradas en aspectos e lugares de Galicia. Desexa que a súa actividade teña unha pegada positiva na xente e na cultura galega, apunta que considera moi importante coñecer o que temos máis preto, tendo en conta que o patrimonio galego é moi rico. Facendo balance, algo máis da metade dos seus seguidores é do resto da península e de numerosos países latinoamericanos, aspecto que aproveita para dar a coñecer Galiza tamén á xente de fóra.
Santiago prefire non falar de éxito e insiste en que esta boa acollida probablemente foi froito de ter aproveitado un nicho un tanto baleiro. Aclara que existen moitos creadores de contido histórico, pero que xustamente o tipo de historias que el conta non o fai moita xente. “O xeito de contar datos históricos a través de reels e de directos creo que é un moi bo formato para que sexa máis accesible e interesante para a xente nova”, afirma. Cre que actualmente o interese polas orixes dos sitios onde vivimos volve estar medrando e que a globalización e a posibilidade de viaxar a outras partes do mundo tamén esperta a curiosidade da xente que desexa ver espazos históricos en persoa.
Nesta nova etapa como residente, na que está cumprindo o seu soño de dedicarse á súa outra paixón, a medicina, non ten tanto tempo para ler e escribir. A pesar diso, o interese da xente pola historia e a cultura motívalle a seguir co proxecto. O seu obxectivo é continuar publicando contido ao tempo que se converte en médico, e, por que non, algún día ter un libro publicado baixo o nome de Santiago Ogando.
Ver esta publicación en Instagram
