Caos na cidade, autobuses e estradas colapsadas e moita xente lista para ir ao festival do ano: O Son do Camiño. Así estaba Santiago no mediodía deste mércores, primeira xornada dun dos eventos máis grandes de Galicia.
A climatoloxía non puido acompañar mellor nas primeiras horas do festival: sol e calor, propio dunha tarde de verán e alentador despois das intensas chuvias que tivo Galicia este pasado mes de maio.
Os concertos comezaron ás 15:20, cunha actuación de Amoebo, aínda sen moita xente no Monte do Gozo. Tras varias actuacións máis (Hot Milk, Maryland ou The Interrupters), comezaba a chegar toda a masa de xente ao festival, lista para ver os pratos fortes desta pequena xornada de inicio. A partir das 18:10 comezaba o concerto do artista ibicenco Fernandocosta ao mesmo tempo que tamén comezaban a andar as actuacións no escenario Son Electro by Repsol, que foron ininterrompidas até 3:40 da madrugada.
Moitas persoas aproveitaron esta primeira xornada do festival para coñecer o recinto, explorar as experiencias que moitas marcas e empresas preparan cada ano, beber algo nas barras habilitadas ou incluso subir á noria, novidade do Son do Camiño que se implantou dende o ano pasado.
Despois do concerto do grupo de rock Arde Bogotá, no que o recinto estaba ateigado de xente, comezou unha das dúas grandes promesas deste primeiro día de festival: o concerto de J. Balvin. Foi a partir de aquí cando toda a xente comezou a amontoarse fronte ao escenario Xacobeo e onde o panorama comezou a parecerse máis xa ao que nos ten acostumados O Son do Camiño.
O concerto do colombiano abriu co seu tema ‘Rojo’ e durante hora e media fixo vibrar a ritmo de reggaeton e música latina as gradas situadas fronte ao escenario, cun público novo moi entregado.
Outro dos grandes esperados foi Green Day, que ofrecía o seu inicio de xira este mesmo día no escenario Estrella Galicia, pero que resultou nun concerto, para moitos, algo descafeinado, deixando con ganas de máis. Foi o concerto co que se puxo o sol no Monte do Gozo e co que tamén chegou o frío ao recinto. Se a xornada comezara con temperaturas propias do verán, rematou con vento e unha baixada dos termómetros que obrigou a máis de un a abrigarse.
O concerto comezou con ‘The american dream is killing me’ e xa dende o comezo, malia a impecable actuación do grupo californiano e o seu indubidable aguante de perfección até o final durante case tres horas de música sen parar, a técnica de son decepcionou a moitos.
Malia o impresionante do espectáculo, con lume, petardos e unha man xigante inchable, o vento non axudou ao equipo técnico de son, que nun primeiro momento facía ir e vir o son, non deixando escoitar ben a música nalgúns momentos.
Aínda que o frío fixo que a maior parte da xente non parase de saltar e moverse e que a maior parte estaban moi entregados polo concerto, a sorpresa para todos foi que rematou media hora antes do que estaba previsto no programa, deixando a todo o mundo pendente do escenario despois da última canción agardando algo máis.
O broche final púxoo a DJ belga MATTN, participante de grandes festivais como Tomorrowland. Un final que nunca erra no Son do Camiño e en todos os festivais, rematando a noite con música electrónica e house progresivo que non deixou que o público parase de moverse.
Aínda que para moitos a xornada rematou ás 2:15 coa finalización deste concerto, cando grande parte dos asistentes se dirixían cara as saídas para retornar en coche ou autobús, a música non acabou no Monte do Gozo ata as 3:40. Aqueles que quedaron con ganas de máis música electrónica, puideron desfrutala durante máis dunha hora no escenario Electro by Repsol.
A SEGUNDA XORNADA
A segunda xornada, que terá lugar este venres, acollerá tamén grandes concertos. Dará comezo ás 15:20 con Marilia Monzón e continuará con Monoulious Dop, Recycled J, Judeline, La Oreja de Van Gogh, Love of Lesbian, Myke Towers, Pet Shop Boys, Natos y Waor e Icona Pop. Simultáneamente, no escenario Son Electro by Repsol teremos a Richi Risco, Toni Varga, Cristina Tosio, Viviana Casanova, Solardo e Ben Hermsley.
