O Ateneo de Santiago presentou este mércores a oitava edición do Festival Ateneo Barroco, que se celebrará entre o 6 e o 20 de outubro en diferentes espazos da cidade. O acto contou coa participación do presidente da entidade, Francisco Candela; do director do festival, Víctor Carou; e do director da Axencia Galega das Industrias Culturais, Jacobo Sutil.
A programación desta nova entrega incluirá seis concertos de abono, aos que se sumarán actividades complementarias como conferencias, sesións de cinema, club de lectura, encontros cos artistas e propostas de improvisación. Estes contidos paralelos daranse a coñecer nas vindeiras semanas e forman parte da liña de traballo coa que o festival procura ampliar a experiencia máis alá dos recitais.
Nesta oitava edición, o festival continúa o proxecto bianual iniciado en 2025 baixo o título ‘Instrumental’, centrado no papel dos instrumentos na música antiga e barroca. A proposta permitirá achegar ao público instrumentos con menor presenza nos programas actuais, como o quintón, o colascione, a arpa italiana de tres rexistros, a viola de roda, a zanfona, o fagot barroco, o clavecín ou a familia das violas da gamba.
Durante a presentación, Francisco Candela salientou que o Festival Ateneo Barroco “non se limita a definir unha programación de concertos”, senón que procura ofrecer “máis contido e máis profundidade” a través de actividades arredor dos repertorios, dos intérpretes, dos estilos e dos instrumentos. O presidente do Ateneo destacou tamén a vontade de manter unha política de prezos accesibles, con abonos de 35 euros para os seis concertos e de 25 euros para menores de 30 anos. Ademais, haberá un concerto adicional gratuíto na Capela Real do Hostal dos Reis Católicos.
O festival abrirase o martes 6 de outubro, ás 20:00, na Igrexa da Universidade, co regreso de Lina Tur Bonet, que presentará ‘Bach, partita, sonata. O violín do gran mestre’. O programa estará dedicado ás sonatas e partitas para violín só de Johann Sebastian Bach, xunto con obras de Heinrich Ignaz Franz von Biber e Nicola Matteis.
A segunda cita chegará o mércores 7 de outubro, ás 20:00, no Teatro Principal, con ‘A nova música. O nacemento da ópera’, unha proposta encargada polo festival a Ars Atlántica. O proxecto estará dirixido por Manuel Vilas, que tamén tocará a arpa italiana de tres rexistros, e contará coa soprano portuguesa Raquel Mendes.
O venres 9 de outubro, tamén no Teatro Principal, Resonet presentará en primicia ‘Os alegres días de Nápoles’, un proxecto liderado por Mercedes Hernández e Fernando Reyes tras un longo proceso de investigación. O programa terá como eixo a música nos tempos de Pedro Fernández de Castro, vicerrei de Nápoles e sétimo conde de Lemos. Participarán Mercedes Hernández, David Sagastume, Christian Losada, Paulo González, Rogerio Gonçalves e Fernando Reyes.
A programación continuará o martes 13 de outubro no Salón Teatro con Arc & Volta, o proxecto de Xurxo Romaní e Anna Casademunt, que presentará ‘Chorea Secundum Galliam’. A proposta xirará arredor da música cortesá francesa do século XVIII para viola de roda e viola de gamba.
A recta final comezará o venres 16 de outubro, ás 20:30, no Paraninfo da Universidade, co debut en Galicia do clavecinista francés Bertrand Cuiller. O músico ofrecerá ‘Ceo e terra’, unha viaxe musical desde os virxinalistas ingleses William Byrd e John Bull ata as sonatas de Domenico Scarlatti.
A clausura terá lugar o martes 20 de outubro, ás 20:00, no Salón Teatro, con Accademia del Piacere e Fahmi Alqhai, que presentarán ‘In dulci jubilo. Bach, a ineludible recreación’. O concerto proporá unha revisitación dos corais de Johann Sebastian Bach a través das violas da gamba, o quintón e o órgano.
Víctor Carou subliñou na presentación o compromiso do festival coa presenza de mulleres creadoras, intérpretes, artistas e investigadoras, así como coa participación de músicos galegos especializados nas músicas antigas. Segundo explicou, a programación combina esa presenza galega con artistas de traxectoria nacional e internacional.
Pola súa banda, Jacobo Sutil puxo en valor a calidade da programación, a participación de intérpretes galegos e o carácter singular dunha iniciativa privada promovida polo Ateneo de Santiago, co apoio de distintas administracións e entidades. O director de Agadic definiu o festival como unha proposta “de primeira orde” para Santiago, para Galicia e para o conxunto dos afeccionados á música antiga do noroeste peninsular e do norte de Portugal.
