O festival Dálle Xogo regresará a Área Central do 25 ao 27 de setembro cunha segunda edición que amplía a súa duración, o número de actividades e o espazo destinado ás partidas. A cita contará este ano con tres días de programación e máis de cen mesas de xogo, fronte aos dous días da primeira edición, coa intención de reforzar a súa presenza no calendario galego dedicado aos xogos de mesa.
A concelleira de Dereitos e Servizos Sociais, Promoción Económica e Xuventude, María Rozas, presentou este martes a nova edición xunto cos organizadores do festival, Kiko Cociña e Cristina Neira. A representante municipal explicou que a Concellaría de Xuventude apoia a iniciativa pola súa vinculación con outras formas de lecer entre a poboación máis nova e coa promoción das relacións sociais fóra dos dispositivos dixitais.
Rozas sinalou que a colaboración municipal responde ao interese do departamento por reducir o uso excesivo das pantallas entre nenos e adolescentes. Segundo apuntou durante a presentación, un estudo recente da Fundación Pau Gasol sitúa nun 70% a porcentaxe de menores que pasa máis de tres horas diarias diante de pantallas, un hábito sobre o que diferentes investigacións veñen advertindo polas súas posibles consecuencias físicas, psicolóxicas e sociais.
Neste contexto, a concelleira defendeu o potencial dos xogos de mesa “para alonxar aos mozos e mozas das pantallas, favorecer a socialización e o tempo compartido coas amizades e coas familias, e para fomentar a creatividade, a autonomía e a capacidade de reflexión”. Rozas lembrou ademais que máis de 5.000 persoas pasaron pola primeira edición, unha cifra que, segundo indicou, evidencia o interese existente por este tipo de propostas.
Os organizadores explicaron que a resposta obtida o pasado ano levou á organización a ampliar a iniciativa. “Despois da boísima acollida da primeira edición, este ano marcámonos o obxectivo de medrar e consolidarnos”, sinalaron Kiko Cociña e Cristina Neira, que tamén destacaron a incorporación de actividades relacionadas con ámbitos diferentes ao estritamente lúdico, entre eles a saúde, a educación e a socialización.
MÁIS MESAS, TORNEOS E EDITORIAIS
Durante os tres días do festival, o público poderá achegarse a máis dun cento de mesas nas que se presentarán novidades, se poderán probar distintos títulos e se organizarán partidas e competicións para diferentes idades e niveis. A programación abrangue tamén demostracións, actividades, charlas, firmas e encontros con profesionais vinculados á creación e á ilustración de xogos.
Na zona dedicada ao sector estarán presentes editoriais e distribuidoras como Oldteddys, Mercurio, Asmodee, Rocket Lemon Games, Átomo Games, Brain Picnic, Hello Fun, Diset, NSV, Empydea Games, Upple Games, Numeriu, Magic Box, Piensa en Competencias e Rey Mono. Entre as competicións previstas figuran torneos arredor de títulos como ‘Pelusas’ ou ‘Hitster’.
O programa contará tamén coa participación da escritora Ledicia Costas, que levará ao festival o universo de ‘Poquelandia’. Xunto a ela estarán Jorge Tabanera, Gatotonto, ilustrador vinculado ao ámbito dos xogos de mesa, e Nuria Vita, investigadora especializada neste sector.
O XOGO COMO FERRAMENTA NO ÁMBITO DA SAÚDE
Unha das actividades centrais será a mesa redonda ‘Máis aló do lecer: o poder dos xogos de mesa no ámbito da saúde’, dedicada a analizar as posibilidades desta forma de ocio desde diferentes perspectivas sanitarias e sociais. Na conversa participarán representantes de Agadea e Dano Cerebral Santiago, ademais de Laura Adela, con achegas relacionadas tamén coas adiccións e as drogodependencias.
A organización quere reforzar nesta edición a vertente social, educativa e inclusiva da iniciativa mediante a incorporación de entidades compostelás e galegas. A Fundación Down Compostela disporá dun espazo propio aberto ao público, mentres que Vermislab levará a Área Central unha zona de xogos ‘Maker’.
Dálle Xogo pretende así reunir nun mesmo recinto a editoriais, distribuidoras, autores, ilustradores, entidades sociais, profesionais e público interesado no sector, cunha programación que aborda o xogo non só como opción de lecer, senón tamén como instrumento de aprendizaxe, convivencia e inclusión.
Todas as actividades serán gratuítas e de acceso libre ata completar aforo, aínda que algunhas das propostas precisarán de inscrición previa a través da páxina web do festival.
