O músico Pakolas e a creadora Azul do Atlántico Ilustración uniron esforzos para presentar ‘Caldo de repolo’, un novo videoclip no que ingredientes básicos da cociña galega convértense en personaxes animadas. A peza, xa dispoñible, acompaña unha canción de ton rockeiro que formará parte do espectáculo ‘Ecoralia a lambona ecolóxica’, estreado este ano.
No traballo audiovisual, os protagonistas son patacas, repolo, fabas, unto e chourizos, nunha proposta que transforma estes elementos nun elenco que se move ao ritmo da música. A autora compostelá encargouse da montaxe e das ilustracións empregando técnicas diversas, desde acuarela e gouache ata pintura acrílica e lapis de cores. O videoclip está realizado en stop motion, a partir dun storyboard inicial e dunha longa sesión de fotografías que lle dá vida ás figuras recortadas. Segundo explican desde a produtora, o proceso sustentouse nunha mesa “chea de personaxes e recortes”, unha cámara fixa e moitas horas de traballo continuado.
Pakolas continúa estes días coa súa xira por Galicia e fará parada en Santiago o sábado 22 ás 18:00, cando actuará no Auditorio Neira Vilas da Biblioteca de Galicia, na Cidade da Cultura. A súa presenza insírese na celebración do Día da Música, incluída no Calendario do Libro da Xunta de Galicia. A proposta, centrada na súa coñecida personaxe Ramona Órbita, forma parte dun programa que busca pór en valor a creación musical dirixida ao público infantil e familiar.
A colaboración entre o ilustrado universo visual de Azul do Atlántico e a estética sonora de Pakolas suma así unha nova peza ao catálogo de producións galegas para público novo, cunha aposta polo humor, a creatividade e a reivindicación da cultura culinaria propia.
